بەیان نوری تۆفیق
(ئەم چیرۆكە لە ژمارە 26ی ئایاری 1994ی گۆڤاری “پەیامی ڕاستی”دا بڵاوكراوەتەوە كە بۆ یادی كۆڕەوی 1991 نوسراوە).
ئەمشەویش لێزمەی باران بەردەوامەو جێگە پەنجەیەك بە وشكی لە لاشەی هیچ كامیاندا نەماوە، یەكەمین جاریان بوو بێویستی خۆیان و بێ ئامانج ڕێگایەك ببڕن، ناوبەناو بێدەنگ دەبوون لەشەرمی ئەوەی كە كەس گوێی لێیان نەبێت و ناوبەناویش بە ناچاری دەكەوتنە قسەكردن:
-پیاوەكە تەواو هێزم نەماوە، ئازارم زۆرە
-خۆت ڕابگرە بڕۆ بەردەوام بە، بەڵكو خوای گەورە دەروویەكمان لێبكاتەوەو ئوتومبیلێك هەڵمان بگرێت.
بەو نیازەوە وردە وردە هەنگاوەكانیان هەڵدەهێنا و هیچ ئوتومبیلێكیش نەبوو كە زیاد لە توانای خۆی خەڵكی هەڵنەگرتبێت، هەروەك لە مەیدانی مەحشەریشدا بن كەس ئاگای لە كەس نەبوو، هەر كەس دەیویست خۆی رزگار بكات، جا چۆن شوێنی گەرمی خۆیان دەبەخشن.
-باوەڕ ناكەم هیچ نەخۆشخانەیەك لێرەوە نزیك بێت ئافرەتێكی شارەزام بۆ بدۆزەرەوە.
-جا بڵێی ئەگەر شارەزاش لەم ناوەدا هەبێت بۆ ماوەیەك پشوو بدات و ڕێگاكە نەیقۆزێتەوە؟
پەنای بردە بەر چەند كەسانێك بێسوود بوو، هاتەوە لای خێزانەكەی و تەماشای كرد ئارەقی دەركردوەو هەناسەی تەواو توند بووە، شڵەژاو بە توندی كەوتە هاواركردن
-خەڵكینە بۆ خاتری خوا وا ئەم ئافرەتە مرد فریام كەون، خێرەو مەندێك بێت بە لایا خوا حەز بكات زوو ڕزگاری دەبێت لە ڕێگاكە زۆر دواناكەون، هەر یەك كەس یەك….قسەكەی بۆ تەواو نەكراو دایە پڕمەی گریان.
دەنگی هاوارو گریانەكە بووە داو و قاچی پیرێژنێكی لەوێدا گرت و سۆز و بەزەیی بۆ ئەم ژن و مێردە جوڵاو فرمێسك بەری چاوی ئەویشی گرت ودانیشت بە دیار ئافرەتەكەوە.
كچم نازانم لەم سەرە ڕێیەدا نازانم بڵێم پاڵ بنێ بە چییەوە؟مەگەر هەر خوای گەورە پشتیوان بێت.
-پورێ گیان وا مردم.
-نا كچم خۆڕاگربەو وورەی پیاوەكەشت مەڕوخێنە، دەمت بنوقێنەو هێز لە خۆت بكە.
-پیاوە دەم بە دوعا هاواری دەكردە خوای گەورە و دەپاڕایەوە و بیری دەكردەوە و دەیووت، ئەمە ئەو رۆژەیە كە ساڵێكە بیری لێدەكەینەوە كە ئاخۆ كەی ببینە خاوەنی كۆرپەیەك، ئافرەتە زیاتر ڕەنگی هەڵبزڕكاو رووی كردە مێردەكەی:
-ئەم كۆرپەیە ئەگەر هاتە دنیاوە تاكە یادگاری هاوبەشی نێوانمانە و تا دەتوانیت بیپارێزە
-ئافرەت بزانە ئەم پورێیە چیت پێئەڵێت وا بكە كاتی ئەو قسانە نیە.
دەمی نوقاندو هێزی لە خۆی كردولەگەڵیدا دەنگی ساوایەك تێكەڵ بوو بە دەنگی سەدەها هاوارو گریانی منداڵانی برسی و هەڵلەرزیوی بەر سەرماو سۆڵەی ئەو شەوەو گیانێكی پاك و بێگەردیش بەرەو ئاسمان هەڵكشا.
پیرێژن ئەبڵەق بوو نەیزانی ناوكی ساواكە ببڕێت یان خەریكی لاشەیەكی ساردەوەبوو بێت یان دڵخۆشی لاوێك بداتەوە كە لەوە دەچێت هێشتا تێنەگەیشتبێت چی روویداوە، یان تێیبگەیەنێت كە هەڵەی ئەمی تیانیە…..
-كوڕە شیرینەكەم هیچ هەڵەیەكی منی تیا نەبوو.
-چی؟تۆ ئەڵێی چی پورێ گیان تێناگەم
فرمێسكەكانی ئەم جارەی بەسەر ڕیشیدا هاتە خواەوەو نەیدەتوانی هیچ وشەیەك بدركێنێت جگە لە ((انا لله و انا الیه راجعون))دەستێكی هێنا بەسەر ئەو لاشەیەی كە دەتوت ئاوی باراناوی ئەو شەوەی هەمووی گرتۆتە خۆی، بە زۆر دەیویست لێوەكانی بجوڵێنێ و قسەیەك بكات بەڵام لە توانایدا نەبوو ، پیرێژنەش هەر چۆنێك بوو ناوكی ساوای بڕی و كەوتە داوای جل لە رێبوارانی سەر رێگاكە.
گیانی باوكایەتی لە ناخیدا جۆشی داو پەلاماری ساواكەی داو نوسانی بە سنگیەوەو پاشان بلوزە تەڕەكەی بەری خۆی داكەند و تێوەی ئاڵاند:
-كوڕم خۆشت رەقدەبیتەوەو بلوزەكەش تەڕە.
-پورێ گیان گوێت لە دوا وشەی دایكی نەبوو؟
پیرێژن هۆشێكی هاتە بەرخۆی كە بە پورێ گیان بانگی كرد و زانی كە هیچ لە دڵیدا نیە بەرامبەر بەم، بەڵام بۆ دڵنیایی قسەكانی دووپات كردەوە:
-كوڕم هیچ هەڵەیەكی منی تیانەبوو، هەموو توانای خۆمم لەگەڵیدا بەكارهێنا.
-پورێ گیان سات و كاتی مردن لای خوای گەورە دیاریكراوە، هەڵەی تۆی چی؟
پاش شاردنەوەی لاشە بە باران شۆراوەكە نەیدەزانی هەروەك ئەم خەڵكە بەردەوام بێت لە رۆشتن یان وەكو ئەو هەندە كەمەی تر بگەڕێتەوە؟بۆ كوێ بگەڕێتەوە؟لەگەڵ یەكێكدا هاتۆتە دەرێ و لەگەڵ یەكێكی تردا بگەڕێتەوە؟ئەگەر بەردەوام بێت بەردەوامی چی؟ئەمە سەرەتای ڕێگایەكی تازەیە،ئەو ڕێگایەی بە فرمێسك و برسێتی و سەرما دەستی پێكردوە.
تەماشای خەڵكەكەی دەكرد هەمووی ورەی بەردابوو وشەكانی ناڕەزایی دەربڕین لە هەموو لایەكەوە دەبیسترا، خەمەكەی قورستر بوو كەوتە پاڕانەوە (خوای گەورە دەروویەك لەم خەڵكە بكەیتەوە چونكە زۆر بێ وورەن كەمی فێری سەرماو برسێتی بووە، کششەمیان وەك ئەم ساوایە لە سەرەتای ژیانیانەوە برسی بوون ).
لە پڕ بیری كردەوە بڵێی ئەم ساوایە تا چەند بەرگەی برسیەتی بگرێت؟نابێت هەروا دەستەپاچە بم با هەوڵێكی بۆ بدەم،هەوڵدان لە كوێ؟كەم ئافرەت شیرەكەی بەشی منداڵەكەی خۆی دەكات زۆربەی بەرەو وشك بوون چوون،كەواتە با بۆ بەشە رۆزییەكەی خۆی بگەڕێم تا بۆی دەدۆزمەوە.
پاش چەند كاتژمێرێك بەشە رۆزییەكەی لە مەمكی دایكێكدا بۆ دۆزرایەوە كە كۆرپەكەی باوەشی ساردەوەبووی دایكی گۆڕیبوەوە بە باوەشی خاك.
فرمێسكی دایكی بێ ساواو ساوای بێ دایك و باوكی جگەرسوتا و لاوی خۆشەویست مردوو تێكەڵ بە یەك بوو ونزایان گەیشتە خوای گەورەو لێزمەی بارانی راوەستان.
