نه‌به‌ز هه‌ورامى*
2/4 ڕۆژى جیهانیى (هۆشیارى ئۆتیزم)ه، چه‌ند ساڵێكه له هه‌رێمى كوردستانیش بۆ ئه‌م ڕۆژه ڕێوڕه‌سم ڕێكده‌خرێت،
به داخه‌وه ڕۆژى ئۆتیزمیش وه‌ك زۆر بۆنه‌ى دیكه‌مان، زێتر قسه‌ى تێدا ده‌كرێت، نابینین له‌م ڕۆژه‌دا پڕۆژه‌یه‌كى گه‌وره و گرنگ ڕابگه‌یه‌نرێت، یان بكرێت به ده‌رفه‌تى هه‌ڵمه‌تێكى هۆشیاركردنه‌وه، هه‌روه‌ها له ڕێگه‌ى كۆڕ و كۆبوونه‌وه‌ى تایبه‌ته‌وه و له كات و شوێنى گونجاودا و به ئاماده‌یى شاره‌زایانى بواره‌كه و خێزانى ئۆتیزم، گفتوگۆى زانستى و فره‌وانى بۆ ڕێكبخرێت..
ده‌بوو له ڕۆژێكى وه‌هادا مژده‌ى ته‌واوبوونى سه‌نته‌رێكى پێشكه‌وتوو بۆ ڕاهێنان و خزمه‌تكردنى كه‌سانى ئۆتیزم ڕابگه‌یه‌نرایه، ئاخر چه‌ند ساڵێكه قسه‌وباس و به‌ڵێن له‌باره‌ى سه‌نته‌ره‌وه هه‌یه، ده‌بێ به‌رپرسان بزانن خێزانى ئۆتیزم به‌و هه‌موو فشارانه‌وه كه له‌سه‌ریانه، حه‌وسه‌ڵه‌ى گوێگرتنیان له قسه و وتارى بێ كرده‌وه نیه و نایانه‌وێت بۆنه‌كه‌یان بۆ مه‌رامى حیزبیى و شه‌خسیى بقۆزرێته‌وه..
ئه‌وه‌ى ئێستا بۆ خزمه‌تى ئه‌م توێژه هه‌یه، له سه‌نته‌ر و له ڕێنمایى و خزمه‌تكردن و پشتیوانیى مادیى و مه‌عنه‌وى شتێكى زۆر كه‌م و ڕه‌مزیه..( ئه‌وانه‌شى له‌و بواره‌دا كارده‌كه‌ن زێتر پشتیان به هیممه‌ت و خه‌مخۆریى خۆیان به‌ستووه) له كاتێكدا كه‌سى ئۆتیزم چه‌ندین كێشه‌ى گه‌وره‌ى هه‌یه و فشارێكى زۆرى ده‌روونیى و كۆمه‌ڵایه‌تى و ئابووریى بۆ خێزان دروست ده‌كات…بێگومان ئه‌گه‌ر ئاوڕدانه‌وه‌ى پێویست له هه‌موو ڕوویه‌كه‌وه ببێت، كه‌سى ئۆتیزم دۆخى به‌ره‌و باشیى ده‌ڕوات، به تایبه‌ت له‌وانه‌یاندا كه به‌هره و تواناى جۆراوجۆر هه‌ن، یان حاڵه‌ته‌كه‌یان زۆر قورس نیه.
له كۆتاییدا به پێویستى ده‌زانم ئه‌وه بیر بخه‌مه‌وه كه ڕاگه‌یاندن له ناساندنى دونیاى ئۆتیزمدا، ده‌توانێ ڕۆڵى گه‌وره‌و كاریگه‌ریى هه‌بێت.
ــــــــــــــــــــــــــــــــــــــــــــــ
*توێژه‌رى ده‌روونیى/ڕاهێنه‌ر له بوارى په‌روه‌رده‌ى تایبه‌ت/باوكى كوڕێكى ئۆتیزم.
