لەودیو لایك وكۆمينتەكانەوە چی دەگوزەرێت

ئا/ ئایندەسازی
( چەند بەسەر هاتێكی واقعی كۆمەلگەی كوردین كە فەیسبوك دەبێتە دێوەزمەو ژیانیان تاڵدەكات)
پەشیمانم
زانكۆم تەواوكرد لە بەر باشی بڕوانەكەم لەماوەیەكی كورتدادامەزرام، پاش ساڵێك كوڕێكی ناسراومان هاتە خوازبێنیم لەهەموو ڕوویەكەوە لەگەڵ خێزانەكەماندا گونجاو بوو، بۆیە ڕازی بووم و هەرواش بوو، تا ئەهات ڕێز لە نێوانماندا زیاتر ئەبوو، كێشەش دەبوو هەر خۆمان چارەسەرمان ئەكرد، لە ماوەی حەوت ساڵدا بووینە خاوەنی دوو مناڵ، لە نێوان كارو مناڵ پەروەردە كردن و ئەركی ماڵدا سەرقاڵبووم، هاوسەرم لە ڕێی كارەكەیەوە سەفەرێكی بۆ هاتە پێش، ئەمە هێندەی تر ئەركی منی قورستر كرد، یەكەمجار لە كارەكەمدا ناوی ( فەیسبوك)م بیست، هاوڕێكانم هەموویان بەكاریان ئەهێنا، بەڵام من ئەموت كاتم نیە بۆ ئەم شتانە، ڕۆژێك هاوڕێیەكم لاپتۆپەكەی هێنابوو لەگەڵ خەتی ئینتەرنێتەكەی پیشانیدام، زۆر سەرنجی ڕاكێشام، ئەو كاتە خەڵكی بەدەگمەن هەیانبوو، منیش لەبەر ئاستی زانستی و بڕوانامەكەم ئەمەم بەلاوە ئاسانبوو، بڕیارمدا منیش فەیسبوكێك بەناوی خۆمەوە دانێم، بەڵام وێنەی خۆم بڵاونەكەمەوە، هەر بۆیە پڕۆفایلەكەم وێنەی یەكێك لەمناڵەكانم بوو.
تا ساڵێك هیچ كێشەیەكم نەبوو، ڕۆژێك كوڕێك هاتە خەتەكەمەوە سڵاوی كرد من نەمئەناسی، وتی ئەدەكەم بۆ قبوڵ ناكەیت خانم؟ وتم لەبەر ئەوەی من بێگانەو نەناسراو قبوڵ ناكەم، ئەو هەر لەسەری ڕۆشت ئاگام لە خۆم نەبوو نیو سەعات بوو چاتم لەگەڵ ئەكرد، ئەو زۆرزانانە قسەی ئەكرد، وەك جادووم لێبكات دڵم نەرمبوو، لەنێو سەر قاڵیەكانی خۆمدا بیرم لە هیچ شتێك نەئەكردەوە، بەڵام ئەو هەموو شەوێك نامەو سڵاوی بۆ ئەناردم، ئەحواڵی مناڵەكانمی ئەپرسی یان لە ئیش چۆن بووم، باسی زۆر شتمان ئەكرد وەك بارودۆخی سیاسی و پەروەردەیی…..، منیش واملێهات كە دەچوومە خەت یەكسەر بەدوای نامەیەكی ئەودا ئەگەڕام، تا وایلێهات ئەگەر ئەو سەلامی نەكردایە من ئەمكرد و هەواڵم ئەپرسی، پاشان نامەكان بوونە لینكی گۆرانی و بوونە بابەتی تر، منیش چێژم لەنامەكان ئەبینی، وێنەكانی ڕۆژانەی بۆ ئەناردم منیش بەهەمان شێوە، وردە وردە تا ئەهات پەیوەندییەكەمان بەرەو ئاقاری خراپتر ئەڕۆشت قسەی نابەجێ ئەكرا.
ژمارەی مۆبایلمان گۆڕییەوە، ئەگەر بیوتایە ناساغم خەمم ئەخوارد، كێشەی هەبوایە بەمنی ئەوت. منیش زۆر شتی نهێنی خۆمم لای ئەو ئەوت، تاڕۆژێك نامەیەكی سەیری بۆناردم نووسیبووی بێتۆ ناژیم و تۆم خۆشئەوێت، منیش وتم: تۆ دوای كڵاوی بابردوو كەوتوویت من مێردم هەیەو تۆش ژن و مناڵت هەن، بەڵام هەر كۆتاییم بەو پەیوەندییە ژەهراوییە نەهێنا، زۆرجار تا بەرەبەیان چاتمان ئەكرد، تا ئەهات هاوسەرەكەم توڕەترو خراپتر ئەبوو لەگەڵما بیانووی پێئەگرتم، لەسەر هیچ شەڕی پێئەفرۆشتم.
ڕۆژێك لە یەكێك لەكەناڵەكانەوە گوێم لە بەرنامەیەك گرت باسی لە(خیانەتی هاوسەرگیری) دەكرد، میوانی بەرنامەكە كە توێژەرێك بوو وتی: ئەوەی لە تۆڕە كۆمەڵایەتیەكان ڕووئەدات جۆرێكە لەخیانەت، سزای یاساییشی ئەبێت، باسی لەوەش ئەكرد كە چۆن ئەو كەسە ئابڕوی ئەچێت و ماڵ و مناڵی پەرتەوازە ئەبن، منیش وەك لەسەر بانێكەوە بەرمبدەنەوە و لە خەوێكی قووڵ رابچڵكێم خێرا خواحافیزیم لەوكەسە كردوو لە هاوڕێیەتی سڕیمەوە، پاشان فەیسبوكەكەشم بۆماوەی ساڵێك داخست و ژمارەی مۆبایلەكەشمم گۆڕی… ئێستاش ترسێكی قوڵ لە ڕۆحمدایە، ترسی ئەوەی وێنەكان بنێرێت بۆ هاوسەرم و ماڵم وێرانم بكات.
(ژنە دووەمەكەی هاوسەرم لە ئەنستەگرام)
ڕۆژی شادی هەموو كچێك ئەو ڕۆژەیە كە ژیانی هاوسەرگیری پێكدێنێت، بە دونیایەك خەون و خەیاڵەوە دەرگای نۆماڵی ئەترازێنێت، بەتایبەت ئەگەر ئەو كەسەی لە دڵەوە خۆشبوێت، ئیتر ژنان حەزدەكەن ڕۆحی خۆیشیان بكەنە قوربانی ماڵ و مێرد. من كچێكی نازداری خێزانەكەم بووم، لە قوتابخانەش قوتابیەكی زیرەك و خۆشەویست بووم، بڕیارمدابوو تا بڕوانامە وەرنەگرم بیر لە هاوسەرگیری نەكەمەوە. دوای تەواوكردنی كۆلێژی یاسا هاوسەرگیریم لە گەڵ كوڕێكی كاسپدا كرد، دایك و باوكی پەروەرشیار بوون، كوڕەكەش هاوتەمەنی خۆم بوو.ئەو كاتانە ژن بەتەواوی دڵی گرێی خۆشەویستی ماڵەكەی ئەدات كە ئەزانێت دایكایەتی چاوەڕوانیەتی، منیش بوومە دایكی دوو مناڵ، بە رۆح خزمەتی هاوسەرو مناڵەكانم ئەكرد، مووچەكەمم دانابوو بۆخزمەتی ئەوان، قەت هەستم بە ماندووبوون نەئەكرد، خەمی من خەمی پەروەردەی مناڵ بوو. زۆرجار هاوسەرم دوای دوانزەی شەو ئەگەڕایەوە ماڵ، ئەیوت ئیشم هەیە، چونكە كاسب بوو بەلامەوە ئاسایی بوو، ئەموت لەبەرخاتری ئێمە درەنگ ئەگەڕێتەوە.
ڕۆژێك ئەڕۆشتم بۆ نووسینگە پێویستم بە (لاپتۆپ)بوو ئەوەی هاوسەرەكەمم بردو ڕۆشتم، لەگەرمەی ئیشدا بووم لەسەر (وای فای) بوو بەردەوام نامە بۆ ڤایبەری هاوسەرەكەم ئەهاتن، ناچار هەر لە خۆوە كردمەوە چیم بینی، بەتەواوەتی خەریكبوو عەقڵ لەدەست بدەم، باوەڕم نەئەكرد، نامەی كچێك نامەی عاشقانەو وێنەی نیمچە ڕووتی خۆی ئەنێرێت، نەك هەر ئەمە بانگی یەكتریان ئەكرد بە مێردەكەم و ژنەكەم…لەنامەكاندا بۆم دەركەوت ئەمانە بە هەرزەكاری پەیوەندیان هەبووە! هەتا ڕۆژێك هاوسەرم قاپێك یاپراخی هێنایەوە وتی: هی برادەرێكمە، بەڵام من لەوێ بینیمن نووسیبووی یاپراخەكە خۆشبوون، من ژنێكی یاساییم خێرا هەموو نامەكانی ڤایبەرم لای خۆمەوە ڕاكێشان، پەیوەندیم كرد بە ماڵی خەزورمەوە، ئەوانیش زۆر خەمساردانە داوایان لێكردم بێدەنگ بكەم و هیچ نەڵێم، بەڵام من بڕیارمدا كە لێی خۆشنەبم و بیدەمە دادگا، بۆیە ڕووم نایە ماڵی خوشكەكەم كە زاواكەمان خاڵی هاوسەرمە حاڵ و مەسەلەكەم بۆ باسكردن، تاماوەیەكی زۆر نكوڵی ئەكرد لەشتی وا، بەڵام كە زانی بەڵگەكانی لای من زۆر بەهێزن ناچار دانی بەهەڵەكەی خۆیدا ناو لە دادگا بە تۆمەتی خیانەت لەیەك جیابووینەوە، منیش بە دوومناڵەوە گەڕامەوە ماڵە باوان.

(فەیسبوكی خوێناوی)
من دووكانی چاككردن و دانانی بەرنامەی مۆبایلم هەیە، كێشەو پرسیاری سەیرو سەمەرەم لێئەكرێت لەلایەن مشتەریەكانمەوە، مانگی ڕەمەزان بوو بەڕۆژوو بووم كچێكی تەمەن حەڤدە ساڵان، جلی ماڵەوەی پۆشی بوو، تاوێك ئەگریاو تاوێك پێئەكەنی، وتی: ئەتوانیت یارمەتیم بدەیت؟ وتم: ئەگەر بتوانم بەسەرچاو. وتی: كەسێك بەناوی منەوە فەیسبوكی داناوەو ئەدی بۆهەموو هاوڕێكانم ناردووە، هەڕەشەم لێئەكات و ڕەسمم بڵاو ئەكاتەوە، هەتا ڕەسمی هاوڕێ نزیكەكەشم كە ئەگەر بزانێت كێشەم بۆ درووست ئەبێت، ئەگەر براكەشم بەمە بزانێت ئەمكوژێت و لەناوم ئەبات. یارمەتیمبدە مۆبایلی ئەو كوڕەم بۆهاك بكە. وتم: ئەم كوڕە كێیە؟ وتی: هاوڕێمە بەڵام بەقسەكانیا بۆم دەركەوت كە پەیوەندییان هەبوو لە ڕێی فەیسبوكەوە، كوڕەكەش لە هەندەران نیشتەجێبوو. وتی: كە دایكم ئاگاداری ئەم كێشەیەیە هەوڵیداوە چارەسەرم بۆبكات، سەردانی ماڵی ئەو كوڕەی كردوەو داوای لێكردوون وازم لێبێنێت، لەسەر ئەوەش پەیوەندییان تێكچووبوو ئەو كوڕە خراپەكارە داوای ڕەسمی نەشیاوی لێكردبوو ئەمیش بۆی نەناردبوو، لەسەر ئەوە پەوەندییان تێكچووبوو، كوڕەش هەڕەشەی لێئەكرد. وتم: من شارەزای هاككردنی مۆبایل نیم، بەڵام كەسێك ئەناسم بەو ئەڵێم بەشكەم بتوانێت یارمەتیت بدات، كچەكە بەدەم گریانەوە ژمارە مۆبایلەكەی خۆی دانا. چەند ڕۆژێك لەهەواڵپرسیندا بووم شتی وانەبوو كەس بتوانێت مۆبایل هاك بكات.
دوای سێ ڕۆژ تێلم بۆكرد وتم: خوشكم ببورە ئەوەی داوات كرد لای من ناكرێت. هاوڕێكەم كە شەریكە دوكانمەو ئاگای لەمشتەریەكانە ئەو ڕۆژەش كە ئەو كچە هات داوای یارمەتیكرد ئەو لەوێبوو، تێلی بۆكردم وتی: كچێك خۆی كوشت وابزانم ئەوەبوو هات بۆدوكان. منیش خێرا خۆم گەیاندە ئەو شوێنە، بەڵێ وابوو ئەمبوڵانسێك وەستابوو، كچەكەم بینی خستیانە ئەمبوڵانسەكەوە هەمان كچ بوو هاتە دوكان و ناسیمەوە، فیشەكێكی نابوو بەسەریەوە، براكەشی لەو ناوەدا بوو هاواری ئەكرد و جنێوی ئەدا كە هۆكاری ئەم كردەوەیە هەر ئەكوژێت، منیش تا سێ ڕۆژ نەمئەتوانی سەربكەم بە دوكانەكەدا، سیمای خەمباری ئەو كچە مناڵكارەم لەبەرچاو بوو كە هیچی لە دڵڕەقیەكانی ڕۆژگار و مرۆڤەكان نەئەزانی….تامردن ئەو تاوانەم بیر ناچێتەوە، زۆرجار ئەڵێم ئەگەر فەیسبوك نەبوایە ئەم كچە وێنەی چۆن ئەگەشتە دەست خراپەكارێكی وا لەهەندەران.