داستان مەجید – توێژەری دەروونی
لە دەرونناسیدا چەمكێك هەیە بەناوی متمانە بەخۆبوون، لەكردەی تاكیەوە بۆ كردەی كۆمەڵگە ، كە ئەریكسۆن، پێشەنگی سەرەكیە لەم بوارەدا پێی وایە سەرەتای دروستبوونی متمانە و هێز دەگەڕێتەوە بۆ بوونی خولیای تاك بۆ ئەو بابەتانەی هەیەتی، لەهەمان واتادا هەر بونێك وەك تاك شوناسی ئارەزومەندانەی خودی خۆی بێت، هێزی متمانە بەخۆبوون دەگاتە پلەی باڵا و ئەو كەسە ئاڕاستە دەكات بەرەو ئامانجە گەورەكەی كە لەئەزەلەوە هەیەتی.
متمانەی ئافرەتیش ئەو كاتە گەشە دەكات كە هاوسەنگیەك ڕابگرێت لەنێوان ئەو ژیانە ڕۆتینەی تێیدا دەژی لەگەڵ ئەو خولیا و وزە گەورەیەی هەیەتی لەناوەخنی خۆیدا بەجۆرێك لە كردەی تاكیەوە بیگۆڕێت بۆ كردەی كۆمەڵایەتی. خانمانی كوردی دەرەوەی وڵاتیش وەك هەموو خانمێكی دیكەی كوردستان ژیانی ئاسایی خۆی و كاركردنی دەرەوەی وابەستەی یەك كردوە و، ژیانێكی پڕ لە وزە دەبەنە سەر .
هەڵبەت ئیرادە و متمانەی ئەو خانمانە زۆر زیاترن كە گرنگی بە زمان و كلتور و دینی نەتەوەی خۆیان دەدەن و، هەوڵی پاراستنیان دەدەن لە ونبوون و نەمان لە وڵاتێكی زمان و كلتور جیاواز، بۆ نموونە لە شاری لیدسی سەر بە وڵاتی بەریتانیا قوتابخانەیەك هەیە بەناوی (قوتابخانەی نەورۆز) كە كۆی ستاف و مامۆستایانی قوتابخانەكە ئافرەتن، لەهەمان كاتدا بەخۆبەخش كاردەكەن و كاتی خۆیان دەبەخشنە ئە منداڵانەی كە بێبەشن لە خۆشەویستی و نزیكی خاك و نیشتمان و زمانی خۆیان ، خزمەتێك بەو پەڕی هێزی متمانە بەخۆبوونەوە دەكەن بێ ئەوەی لەبەرامبەردا چاوەڕێی هیچ قازانجێكی ماددی بن. سەرەڕای ئەوەش هەوڵیان داوە لەڕێگەی سیمینار و كۆڕی گرنگەوە هۆشیاری كۆمەڵایەتی و خێزانی بڵاوبكەنەوە بۆ بەرچاوڕوونی زیاتر. لەگەڵ ئەمانەشدا ناسنامەی دایكن و هەوڵیان داوە لەڕێگەی چەن گروپێكی جیاوازەوە گرنگی بە دروستكردنی كاریزمای پەرەپێدانی خود بدەن، بیكەن بە پێناسە بۆ كەسایەتی خۆیان و ئەو ژیانە جوانە خێزانیەی هەیانە و بیبەخشنە كەسانی چواردەور بەپاڵپشتی ئەم هەنگاوانە.
١ـــ هەبوونی گروپی ئۆنلاین بۆ بەكلتور كردنی خوێندنەوەو پێشبڕكێ كردن بۆ خوێندنەوەی زۆرترین كتێب.
٢ـــ گەشتی پشووی مێشكی بۆسەردانیكردنی شوێنە جوان و كۆنەكانی شار و پاشان گفتوگۆ لەسەر بابەتێكی فكری و زانستی، ئامانج لێی پشودانە بەڕۆح و جەستە و دوركەوتنەوە لەو جەنجاڵی و تەنهایەی دورە وڵات دەیبەخشێت بە حوكمی دوربوون لەكەس وكار.
٣ـــ بەژداریكردنی كەسانی پسپۆڕ و شارەزا لەبوارە جیاوازەكانی ژیان و گواستنەوەیان بۆ خانمانی دوورە وڵات، بەهۆی ئەوەی دانیشتوانی دەرەوە كەمترین چانسی بەژداریكردنمان هەیە لە سیمینار و كۆڕی زانستی و ئەدەبیدا . وەلێ دڵنیام لەهەموو وڵات و شارو شارۆچكەیەكی دەرەوەدا ئەم گروپ و ڕێكخراو قوتابخانانە هەن، بەلام ڕێژەكەیان زۆر كەمە و گەر هەشبن بڵاو ناكرێنەوەو، حوكمەتی هەرێمیش هیچ پلان و توێژینەوەیكی زانستی و دەست خۆشیەكی نیە بۆ ئەم دامەزراوانە كە لەسەر ئەرك و بەرپرسیارێتی خۆیان گرنگی بە زمان و كلتور و دین دەدەن.
بەخۆشحاڵیشەوە خانمانی كۆی وڵاتانی دەرەوە دەستێكی باڵایان هەیە لەپێگەیاندنی تاك و دروستكردنی قوتابخانە و دامەزراوەی كوردی.
وەك ئاماژەمپێدا قوتابخانەی نەورۆز نموونەیەكی زۆر جوانە لە خەرمانێكدا، كە بۆماوەی چوار ساڵە درێژەپێدەری خەباتی شكۆی كوردە، ئەوەی ئەوان بەچەك دەیان كرد ئێمە بە قەڵەم لەوڵاتی بەریتانیا دەیكەین، بێ ئەوەی هیچ حزب و لایەنێك پشتگیریمان بكات، ئەوەی هەمانە و شانازی پێوە دەكەین ئەو هێز وتوانایانەن كە مامۆستایان وەك دڵی دایكێك هەیانە بێ بەرامبەر دەیبەخشن لەپێناو خۆشەویستی بۆ منداڵانی كورد. بۆیە بۆ هەمیشە بەفۆرمێكی پڕ لە زانست و زانیاری و بە دڵێكی پڕ لەموحیبەت بۆ زمانی كوردی بەردەوام دەبین.
