ڕۆشنا صاڵح
لە پایزێکی خاڵی لەڕەنگی ژیان و بەرامەی ئونوثیتەوە
سرووتی بوون و بەهاداری وڕەنگینیت نوێ کردەوە …
ئەو دەمەی هەرێم پڕ لە گوژاڵکی نادادی و نەزانی بوو
تۆ هاتی و مارشی هۆشیار پەروەردە خێزانت وتەوە…
بارانی ژیانەوە بووی و دوبارە دانێژگاکانت ژیاندەوە…
شنەبای هۆشیاری بووی و غەمی عورفە ناباوەکانت سڕیەوە…
کانیاوی زانیاری بوویت و ئاگری نەزانیت کوژاندەوە …
تیرۆژی خۆری خوودبووی خۆرەی تەقلیدەکاندت تواندەوە …
ئەمستا تۆ و هەگبەیەکی تەژی لە خوشکی سەنگین و پێشەنگی کایەکانی ژیان …
تۆ و دەریایەک لە کار و چالاکی جوان …
تۆ و کۆڕاڵێک لە حوورمەت و مەعرەفە و ئیمان …
تۆ و سەدەیەک لە تۆماری سەروەری و سەعادەتی ئینسان …
ئێستا تۆ و دونیایەکی بێڕەحمی سارد و بێ ڕۆح …
خاڵی لە تەزووی میهر و ئەوین و
لەم سەدەو عصری عەولەمە و لەناو دۆڵی بێ ئامانی تەکنەلۆژیا و لە نادادی و لە ناو هەرێمێک لە گڕ و زریسکی دڵڕەقی حوکومرانی وڵاتدا ، ڕێ دەکەی …
ئەوەی هەتە خودا و خۆت و خەم و خەونی جوان و دین و بەهای بەرزی ژینە.
ئەو دەمەی لە نشێو دۆشداماندا
سینەم نەی ئاسا ژانی ژینمی دەژەنی لەسێرچی خەون خولیاکانما
ئیختیاری هاتنە ناو سایەی پڕ سەروەریتانم قبوڵکرد ، خەنی بووم کە ڕێگاکەم دروستە چوون حەکیمانە وانەکانی ڕۆژگارتان بۆ شرۆڤەدەکردم و ئامێزی پڕ میهرتان بووە دووهەمین هەوارم و سات لەدوای سات نەشئەتان بە خولیاکانم دەکرد
یادگاریەشرینەکانی ڕۆژانی پێکەوە بوون و خوشکایەتیمان ، باوەشێنی باوەڕ بەخۆبوونم دەکەن …
کاتێ کەم ئەزمونانە زەنگی پرسیارم لە کاری دەکردن …
منداڵانە گڕووی کار و چالاکیم دەگرت …
بێقەرارانە چاوەڕێ ئەنجام و بوون بەواقیی پلانەکان بووم وەک خۆی…
تەبیب ئاسا ئەوین و هاوکاریتان دەبووە هەتوانم …
ئەزانن
لەقوڵای ڕۆحما ئەوین و وەفایەکی سنەوبەر ئاسا
بەرە و لوتکە چرۆی گەورەبوونی شینەکا
ترپەکانی دڵم لەسەر ئیقاعی بەردەوامی لەگەڵتان ، ئاوازی خۆشنودی دەژەنێ و
ئاوەز و هۆشم هەنگ ئاسا بەشیلەی حیکمەت و زانیاری کاروانتا ڕۆژانە حسابی بانکی زیاترەکا.
چەن جوانە لەگەڵ ئێوەبوون ، تاوێک دەبین بەبەرماڵ و لە خەڵوەتا کەون کەیلەکەین لەنزا…
وەرزێ دەبین بە باران و تینوێتی ڕێبوارانی ڕێ ژینی فانی دەشکێنێن…
تاوێک دەبین بەتریفە و دڵی خێزانێک پڕ تریقەی شادیدەکەین…
گاهێک دەبین بەدرەخت و بەری سەبر و سەعادەت بەسەر بیمارانا دەبارێنین …
دەمێک باخچەی پڕ لەمەعریفە و زانستین ، بەگوڵزارمان میحراب و ماڵان ئاوادانترەکەین..
ساتێک سەدایەکی شادین بۆ دڵی زارۆکان ….
لەهەر کوێیە سەنگینی و ڕەوشت و حەیا
قەناعەت و خاکی بوون و بۆ خواژیان تیشک و تریفەی دەهاوی ئەوە ئێمەی خوشکانین ..
لەتۆوە فێری فێداکاری و خوود پەسەندی و خوشکایەتی و مڕۆڤدۆستی و میانڕەوی ، هاوکاری وهەوڵدان و بەردەوامی و نوێخوازی و تۆمارکردنی ساتی جوان و داهێنان و برەودان و کۆڵنەدان ، قبوڵکردنی بەرامبەر وەک خۆی بووم .
بەرز و پیرۆزبێت 30ساڵ خەباتی مەدەنی پڕ شکۆی یەکگرتووی خوشکانی ئیسلامی کوردستان
26\10
