بچووكترین مامان

كەتان خادیمی
زانییان منم بوومەتە فیتنەی ماڵ و گەڕەكەكەیان، ژنەكانیان تەڵاق ئەدرێن و كوڕەكان چەقۆ لەیەكتر هەڵئەكێشن، لە بەرەبەیانەوە مقۆمقۆیانە چۆن شاربەدەرم بكەن، یان هەر لێرەدا و لەناو خوێناوی خۆمدا بمگەوزێنن، وەك پشیلەیەكی تۆپیو فڕێمبدەن.
پیاوەكان هەزارجۆر جنێو لە زمانیان ئەبارێت، بە شەق بەربوونەتە دەرگاكە، وەك بڵێی ئەمدیوی ئەم دەرگایە دڕندەترین مرۆڤی تێدا حەشار درابێت.
ژنەكانیش ئەڵێن: ئەم دەڵە قۆڕە پیرەی گەڕەك هەپرون بە هەپرون بكەن. كچەكان بە بوغزەوە لەبەر خۆیانەوە ئەڵێن: مامانی پۆخڵ ئەم گەڕەكە بەجێبێڵە، قەیرە كچی چاو دەر پۆقیو بڕۆ.
جنێوە ئازاراویەكانیان لە گوێمەوە وەك ژەهر ئەڕژێنە نێو جەستەمەوە و بڵاو ئەبنەوە.
مناڵان بۆ بەرد دانامێنن، بەرد بەدوای بەرد تێم ئەگرن. وەك ئەوەی ئەمڕۆ وەرزی بارینی بەرد بێ‌، بێئەوەی خۆم لەبەردەكانیان لابدەم وەك قوماشێكی پڕ پەڵە دراوم بەم حەسارەدا، ئەمەوێت وێنەی تف و جنێوو بەردەكانیان بگرم، جار جارێكیش موورویەكی شین یان تەسبیحێك یان لیرەیەكیان بۆ هەڵئەدەمە خوارەوە، كە هەموو سەروەتی منن لەم دنیایەدا.
هەموو تەمەنی خۆمم لە خزمەتی ئەم شارەدا بەسەربرد، ئەو گەنجانەی كە پڕ بە دەم تفم لێئەكەن زۆریان لەسەردەستی خۆم لەدایكبوون، هێندەی دایكەكانیان بەدەنگی یەكەم گریانیان بزە ئەیگرتم. ئێستاش بە خۆم و مژدانەكانمەوە لەمەرگ نزیك ئەبمەوە، كە هەریەكەیان چیرۆكی ژنێكی ئەم شارەیە، كە بەدەم ژانی مناڵبوونەوە بۆیان ئەگێڕامەوە، چیرۆكی ئەو ژنانەی لە ترسی لەدایكبوونی كچێكی تر فرمێسكەكانیان ئەشاردنەوە، چیرۆكی ژنە تەڵاقدراوەكان، بێ ئەوەی ئنگایەكی كۆرپەكەیان ئازاریان بیربەرێتەوە. ئێستاش كە هەست بە بۆنكڕوزی مەرگ ئەكەم، بیر لە دایكم و بۆڕەی مانگازەرد ئەكەمەوە.
هاوار و جنێوەكانیان بوونەتە تارمایی مەخلوقێكی زەبەلاح، من مامانی ئەم مەخلوقەم كە كەس نازانێت ڕەچەڵەكی ئەچێتەوە سەر بە چ دایك و باوكێكی حەرامزادە، لەوانەیە لەگەڵ یەكم هەناسەیدا منی مامان بكاتە پاروویەك.
لە ڕێكخستنی جلوبەرگ و قژمدا، دەستەپاچەترین و شپرزەترین ژن بووم، ئەو بیركردنەوانە منیان وا سەرقاڵ كردبوو، كاتم نەمابوو بۆ سەیركردنی ئاوێنە و تۆخكردنەوەی مێینایەتییم، بۆ ئاڵوگۆڕ كردنی ڕەنگەكانی تەمەنم، ڕۆحم پڕ بوو لە قریشكەی ژنان و یەكەم ئنگای كۆرپەكانیان، دەستخستنە نێو خوێناو، سەرلەبەری ژیانی گۆڕیم، ئێستا بێجگە لە خانەنشینێك و فیتنەچی گەڕەك هیچی دیكە نیم، لە بەرەبەیانەوە تا خۆرئاوابوون، وەك بووكەڵەیەك خۆم بەسەر ئەم حەسارەدا ئەدەم، تاوانبارم كە بوومە مایەی هاتنە دنیای ئەم مرۆڤە درۆزنانە، سەیری كوچە پێچاوپێچەكانی ناخیان ئەكەم، ژووری ماڵەكانیان وێنە ئەگرم، هەتا بۆنی نێو كەنتۆرو مەنجەڵەكانیشیان هەڵدەگرم.
جاروبار هەر بۆخۆشیی خۆیان لە دوورەوە بە شێتە بانگم ئەكەن، كامە كار زۆر بێشەرمانە و نهێنی بوو بە بەر چاومەوە ئەیانكرد، چێژیان لەوە ئەبینی كە مرۆڤێك هەیە لەم سەرزەویەدا ئەمان لێی ناترسن، گەنجەكان بە دزیی دایك و باوكیانەوە، لە پەنا دیوارەكاندا ئیشی خراپیان ئەكرد، مناڵەكان لەیەكتریان ئەدا و ڕایانئەكردەوە ژوور، ژنەكان بەردەرگاكانی یەكتریان پیس ئەكردەوە، خێسەیان لە مناڵەكانی یەكتری ئەكرد، چاوم لێئەبوو دەستیان بە گیرفانی مێردەكانییاندا ئەكرد و ئەیانكرد بە ئێخەی ماكسەیەكانیاندا تابیخەنە مشتی فاڵگرەكان.
ئەو كوڕەی سوێندی بۆ عاشقەكەی ئەخوارد وەك مۆم لەبەر پێیدا ئەتوێتەوە، لە كۆڵانی ئەودیوتر هەمان قەوانی بۆ كچێكی تر لێئەدایەوە، یان ئەو پیاوەی دنیایەك وشەی ڕۆمانسیی فڕێدایە بەر پێی ژنەكەی، زۆر لە ماڵەكەی دوور نەكەوتبوەوە، كچێكی دیكەی سوار كرد و بە قاقاوە ڕۆیشتن وەك ئەوەی بە گەمژەیی ژنەكەی پێبكەنێت.
بە دەم نووسینەوەی ئەم درۆیانەوە، بیر لەوە ئەكەمەوە، ئەگەر ئەم درۆیانە نەبوونایە لەوانەیە ژیان ڕەنگێكی تری هەبوایە، كاری ئەمانەش بە ئاقارێكی تردا بڕۆشتایە. بە درێژایی سی ساڵی تەمەنی كاركردنم لە قاوشی مناڵبوون، بۆنی خوێن و ناڵەی ژنان كە ئەگەشتە كەشكەشانی ئاسمان، دنیایەكی سووریان لەبەر چاوم دروستكرد، كە تەرمی كوڕێكی كوژراو ئەبینم لە ڕاگەیاندنەكانەوە، بیر لەو مژدانانە ئەكەمەوە كە لەبەرامبەر لە دایكبوونیان وەرمگرت، سەیر بوو بەلامەوە خەڵك هێندە پەرۆشی لە دایكبوونی كوڕ بوو لەم وڵاتەدا، كە مەرگ لە ڕێگای ژیانیاندا نزیكترین شت بوو، یان دەبوو ببێتە سەربازێكی گوێڕایەڵی ڕژێم، یان پێشمەرگەیەكی یاخی بە كەژ و كێوانەوە، دواجار هەر ئازاری جەرگسووتان بوو بۆ دایكەكە. گەورەترین مژدانە مژدانەی ئەو پیاوە بازرگانە بوو، كە هەموو ژنی عەشرەتەكەی هاتبوون لەگەڵی، جوانیی سەروكڵاو و لاگیرە و خشڵەكانیان، سەنگینیی و ویقاریان، لەگەڵ بۆنی دیتۆڵ و ڕەنگی خەستەخانەكەدا نەئەگونجا، كە هەواڵی لە دایكبوونی سێ كوڕم پێدان، یەكێكیان وەك لە زەماوەندا بێت پڕ بە قاوشەكە هەلهەلەی كێشا، خێرا گیرفانی چاكەتە سپیەكەم قورس بوو، هەر ژنەو لەلایەكەوە بانگی ئەكردم و مژدانەی ئەدامێ، بێجگە لە دە دیناری و پێنج دیناریەكانی ئەوكاتە، چەند لیرەیەكیشیان كرد بەگیرفانمدا، ئەو پیاوە وا خۆی ئەنواند و تەسبیحەكەی بائەدا جیاوازە لە هەموو پیاوەكانی تر.
چیرۆكەكانی قاوشی مناڵبوون، هێندەی ژمارەی مرۆڤەكانن كە بەسەر شەقامەكاندا ئەڕۆن، دایكە كزۆڵەكان هەمیشە خەیاڵی خراپیان ئەكرد، خەمی مردنی كچەكانیان ئەبوو، یان خەمی لە دایكبوونی كچێكی تر، ناوی خودا و پێغەمبەر و هەرچی پیاوچاكە بە زوبانیاندا ئەهات، ئەو ژنەش كە بە گەیشتنی بۆنی شمڵی و مێخەك بەسەر بۆنی دیتۆڵ و دەرمانەكاندا كشا، بۆنی تەكیەیەكی كۆنی لێئەهات، فێسێك بەسەرییەوە و مشكیەكی دابوو بە شانیدا، ئەوەندە بە دەنگی بەرز هاواری كرد شێخی حیسامەدین… شاهی نەقشبەند … وردە وردە حاڵی لێهات، هەرچی نەخۆش و كارمەندبوون ئەو شەوە لە دەوری ئەم ژنە كۆبوونەوە، كە دەیوت حەی ئەڵڵا….حەیییی … پرچەكانی وەك ئەوەی خەمێكی گەورە خەنەی بیربردبێتنەوە بەسەر شانیدا پرژو بڵاو بوونەوە، من ئەمزانی سەمای ئەم ژنە، هاواری خەمێك بوو لە قوڵایی برینێكی دڵیەوە، كە مژدەم پێدا كچەكەی مناڵی بووە، ئەو هیچی نەبوو وەك مژدانە بمداتێ، لە گیرفانی هێلەكە قەدیفەكەیدا، نووشتەیەی دامێ وتی: ئیتر تۆ ئەتوانیت ناخی خەڵكی ببینیت، بزانیت چی لەودیو دەرگاكانەوە ڕوو ئەدات.
یەكەمین چیرۆكی من لە گەڵا خوێن یان مامانیمدا، ئەوكاتە بوو كە نەمئەزانی مناڵ لەكوێوە دێتە دنیاوە، قەت لە گەورەكانیش وەڵامێكی تەواوم دەستنەكەوتبوو. تەمەنم نزیكی یانزە ساڵان بوو، خۆمكرد بە گەوڕەكەدا گەلاوێژ، پێی وتم: سەری مناڵەكە ڕاكێشە مناڵەكە كوڕ بوو، وەك هەموو ئەو كوڕانەی تر كە بەرامبەر لەدایكبوونیان مژدانەم وەرئەگرت. هاتنی ئەو ژنە بۆ ماڵمان بە فەرمانی دایكم بوو، دایكم دڵی هێندەی هەموو دونیا بەرین بوو، بەڵام ناوی نەچووە مێژووی ژنە ناودارەكانەوە، ئەو بێ ئەوەی لافیتەیەك بۆكارو چالاكیەكانی هەڵواسێت، یان لە ڕاگەیاندنێكەوە باسی خۆی بكات، هەرچی دڵی شكاوی ژنان هەیە چاكی ئەكردەوە، ئەو شەوەش كە گەلاوێژ بەگریانەوە لەدەرگایدابوو بەپاڕانەوەوە وتبووی: حاجی ژن .. خوایە تۆبە.. خوایە بمكوژیت.. سكم هەیە، گەر بڕۆمەوە لای كەسوكارم ئەمكوژن ئەگەر ئەم گورگانەش پێم بزانن هەڵهاتووم هەر ئەمكوژن، دایكم باوەشی پێدا دەكات و ئەڵێت: ئەگەر خانوەكەشیان ڕووخاندبێت بەسەرما دەستبەردارت نابم، وەرە كچم ..تا چەند مانگێك تۆپەڵێك لۆكەی بەستبوو بە سكیدا تا خەڵكی وابزانن دووگیانە، ڕۆژانە لە پرسیارە زۆرو زەبەندەكانی ژنان خۆی ئەدزییەوە، پێیان ئەوت: حاجی ژن ئەم سكەت واو وایە عەیب نەبێت چوار گۆشە ئەنوێنێت؟
ئەوە بۆنایەیت بتبەمە لای دوكتۆرێ بزانین وەزعت چۆنە؟ من مامانێك ئەناسم سەعاتی لەدایكبوونەكەت پێ ئەڵێت..
دایكیشم كاری ببوە وەڵامی درۆ، زۆرجار لەسەر بەرماڵەكە ئەیوت خوایە لێم نەگریت درۆزن ڕوو ڕەشی لای تۆیە.
ڕۆژێك خواردنم بۆ گەلاوێژ برد، وەك هەمیشە تەسبیحەكەی لە ملیا بوو، چاوە سەوزەكانیشی تەڕبوون، چیرۆكی خۆی بۆگێڕامەوە، وتی: برایەكی تاقانەم هەبوو، مەكتەبی بەجێهێشت و بوو بە پێشمەرگە، لە مەقەڕدا بە هاوڕێ خۆشەویستەكەی وتبوو: بەڵێن بێت ئەگەر بگەڕێینەوە بۆ شار و سەركەوین خوشكێكی چاو سەوزم هەیە پێشكەشتی ئەكەم. لەیەكێك لە دانووستانەكانی حكوومەت و پێشمەرگەدا، براكەم بەڵێنەكەی خۆی بردە سەر، منیان لەو كوڕە مارەكرد، لە نێو جێبێكی سەوزدا كە تەنها چەند پێشمەرگەیەكی عارەقاوی تیا بوو، بەدەم گۆرانی گەلەو… گەلەو چەپڵە ڕێزانەوە منیان بە بوكێنی برد، ئەو دانووستانە زۆری نەخایاند هەڵوەشایەوە، شەوێك بۆ سەردان هاتمەوە لای دایكم، نازانم كێ هەواڵی دابوو، ئەو شەوە دایان بەسەر ماڵی باوكمدا، شەش مانگ زیندان بووم، شەوێك یەكێك لەبەرپرسەكان بردمیە خانوویەكی چۆڵەوە كەسی لێنەبوو، خۆیشی مەست بوو، منیش هەڵاتم، پێشتر لە دایكم و باوكمەوە چاكەی دایكتم بیستبوو، ماڵەكەشتان شارەزا بووم، پەنام هێنایە لای دایكت، ئەمزانی دەست بەڕوومەوە نانێت.
هەر ئەو شەوە دایكم گەلاوێژی بردە گەوڕی مانگا زەردەوە، شوێنێكی تایبەتی بۆدرووستكرد، دەبوو تامناڵەكەی دەبێت كەس نەزانێت لە ماڵی ئێمەیە، من بەو تەمەنە كەمەی هەمبوو، متمانەیان پێدابووم، دەبوو هەواڵەكانی دەرەوە بگێڕمەوە بۆ گەلاوێژ، ڕۆژێك ڕادیۆ كۆنەكەی باوكمم بۆ برد، ئەمزانی كە ئێمەی لانەبێت لەگەڵ مانگازەردەدا قسە ئەكات، ئەو دوانە فێری زمانی یەكتر بوبوون، دایكم بە بڕێك پارە میمە خونچەی هێنایە ماڵەوە تا فێری مامانی بكات، ئەو ژنەی نهێنی هەموو ژنانی شاری لابوو، منیش لە تەنیشت دایكمەوە دائەنیشتم گوێم لەو پیرەژنە بێ دانە ئەگرت، باسی ئەوەی ئەكرد لە پێشدا سەری دێت، بەڵام ئەگەر سەری نەهات و پەلەكانی تری هاتن دەبێت چی بكەین. ئەو ژنە ئەیزانی كە دایكم دووگیان نیە، بەڵام وەك ئەوەی كە فێربێت هەڵگری نهێنی ژنان بێت قەت پرسیاری لێنەكرد.
ئەو ڕۆژەش دایكم لە دەرەوەی شار بوو لە پرسەی هاوڕێیەكی باوكمدا، دوا نیوەڕۆ سەرێكم لە گەلاوێژدا، بینیم لەسەر پشت پاڵكەوتوە و ڕەنگی سوور هەڵگەڕاوە، وتی: سەری ئەو مناڵە بگرەو ڕایكێشە، ئەوە یەكەمین مامانی من بوو، ئنگای تێكەڵ بە دەنگی بۆڕەی مانگازەرد بوو، لەو كاتەوە چێژ لە یەكەم گریانی مناڵ ئەبینم، دایكم هەموو پێویستیەكی لەو ژوورەدا بۆ دانابوو، گەلاوێژ ناوی خوای لێهێناو ناوكەكەی بڕی، یەكەم مامانیم لە نێو زیكری ژنێكی ڕوو بەخواو بۆڕەی مانگازەرد و گریانی مناڵێكی زۆڵدا بوو، لە دەفتەرە تایبەتەكەمدا ناویم تۆماركرد، نووسیم لە دایكبوونێكی بێ مژدانە.
دایكم ئێوارە گەڕایەوە یەكسەر بەرەو گەوڕەكە هات، كە بینی من لەوێم و قوماتێكیش لە تەنیشت گەلاوێژ دانراوە، وەكو دوو خوشك باوەشیان بە یەكدا كردوو لە دڵەوە هەردووكیان گریان، هۆكار زۆربوون بۆ ئەو گریانەیان، لە سەرێكەوە خۆشحاڵبوو كە كچە بچووكەكەی مامانی كردووە، لەلایەكەوە بۆ لە دایكبوونی زۆڵێك لە دامێنی ژنێكی پاكیزەوە، ئەمەش سەرەتای دابڕانیان بوو لەیەكتر، تا ئەو كاتەی لە نەخۆشخانە دەركرام و خانەنشینیان كردم، بە لە دایكبوونی هەر مناڵێك، ناوێكم بە ئارەزووی خۆم لە دەفتەرەكە تۆمار ئەكرد و لە پاڵیشیا ئەو مژدانەیەم ئەنووسی كەوەرمگرتووە بەرامبەر لەدایكبوونیدا، پێویستیشم بە پارە بووبێت دەستم نەبردوە بۆ ئەو پارەیەی بە مژدانە وەرمگرتبوو.
دایكم هەر ئەو شەوە لۆكەكەی لەسكی كردەوە، دۆشەكێكی ڕاخست، ئەو بێشكەیەی كە چەندین مناڵی پێ گەورە كرابوون ڕازاندیەوە، وتی: بەیانی لە كۆڵان بڵێ ئەمشەو دایكم مناڵی بوو فریانەكەوتین مامانی بۆبێنین. هەر بەڕێی گەلاوێژەوە بووم، هەرچی دیاری جوان بوو كە بۆدایكمیان ئەهێنا، بۆم ئەبرد تا دڵخۆش بێت، ئەموت ئەمە كچی حاجی هێناویەتی قوماشی دەرەوەی وڵاتە، ئەم بۆنە دیاری ژنەكەی مامۆستایە، ئەو سابوونانە هی ئەو پیرەژنە سەخیەی گەڕەكە، وەك هەڕاجكارەكانی ناو بازاڕ دیاریەكانم ئەخستە بەردەست گەلاوێژەوە.
هەر لەو ڕۆژانەشدا شارەوانی بڕیاری ڕووخاندنی هەموو گەوڕێكی ناوشاریدا، دایكم پێی وتم پێی نەڵێم، چونكە هەواڵی ناخۆش بۆ زەیستان خراپە، ڕۆژانە دەنگی شۆفڵەكان نزیكدەبوونەوە، حەوت ڕۆژ دوای مناڵ بوونەكەی، دایكم كەلوپەلێكی زۆری بۆپێچایەوە، لە نیوە شەوێكدا بردیەوە بۆلای كەسوكارەكەی، ئەوانیش گەیاندبوویانە ئەودیو سنوور، سەعات نۆی بەیانی شۆفڵەكان گەشتنە گەڕەكی ئێمە، بەرلەوە باوكم مانگا زەردی فرۆشت بە قەسابێك، كە دانی شۆفڵەكە لە دیواری گەوڕەكە گیربوو، بۆنی زیگری خواو خەمی قووڵی ژنێكی پاكیزە بەر لووتم كەوت، ئەو شەوە لە ژێر بەتانیەكەوە تابەیانی بۆگەلاوێژو و مانگازەرد گریام، بۆیە دوای ئەو، ئولفەتم گرت بەمنداڵەكەیەوە كە هەمووان وایندەزانی برامە.
پاش چەند ساڵێك ماڵەكەمان بە دایكم و باوكم و خوشك وبراكانمەوە نغرۆبوو، هەموو شتێك لەم وڵاتەدا لەناكاو لە چاو وندەبوو، مرۆڤەكان، خانووەكان، شەقامەكان …. تەنها یەك چیرۆكی دایكمم لە ڕاگەیاندنەكانەوە بیستەوە لەسەر زمانی ژنێكی دەربازبووی ڕەشپۆشی عەرعەر، (دایكم داوای پەڕۆیەكی كردووە بۆ ژنێك لە كاتی مناڵبوندا، پێیان ئەڵێت ئەی بۆ دەستدرێژیان ئەكەنە سەروو، پاروویەك یان پەڕۆیەكیان نادەنێ، هەر لەوێدا بە قۆناغە تفەنگێك دایكم لە خوێنا ئەگەوزێنن).
نەمتوانی جارێكی دیكە بگەڕێمەوە سەر كارەكەم، بۆلای یەكەمین دەنگی گریانی مرۆڤ، كە هەمیشە گریانەكانی گەلاوێژیان بیر ئەخستمەوە، بە تۆمەتی وەرگرتنی بەرتیل لە دەزگاكانی ڕاگەیاندا دانم نا بەوەدا كە داوای مژدانەم لێكردوون، بەڵام مەرج نەبووە پارە بووبێت، هەرشتێك هەبوایە لە مووروە شین و شیلانەكانیان لە تاڵێك قژیان، خستوومەتە نێو زەرفێكەوە، ئەو ناوەی كە خۆم پێم خۆشبوە لای خۆم تۆماركردووە، ئەگەر ئەو كەسە هیچی نەبووبێت ئینجا پارەم وەرگرتووە، هەندێك ژن لە كاتی ئازاردا ئەیانوت خۆزگە ئەبوویتە براژنمان، بەڵام براكانیان قەت بە كچی وەك من ڕازی نەئەبوون، برای یەكێكیان وتبووی كێ بێزی دێت خواردنی دەستی ژنێك بخوات ڕۆژ تا ئێوارە دەستی لە ناو خوێناوی ژناندا بێت، یەكێكی دیكەیان وتبووی پیاو پیاو بێت چۆن ڕازی ئەبێت ژنی شەو تا بەیانی لە خەستە خانە بێت، هەر ئەوان بوونە شەوێك بە شپرزەیی و بەژنێكی دوو گیانەوە ئەهاتنە لام و ئەپاڕانەوە فریایان بكەوم، لە دواییشدا تەسبیحەكانیان لەبری مژدانە پێ ئەبەخشیم، تەسبیح و چەرخی پیاوەكان زۆرترین مژدانەبوون.
لە دوای ئەو خزمەتگوزارە ڕووخۆشە، دڵم نەچووە سەر هیچ پیاوێكی تر، تەنها ئامانجی شووكردنم ببوە ئەوەی چێژ لە وە ببینم كە مناڵێك لە جەستەم جیا ببێتەوە و لەیەكتری بڕوانین، كردبوومە عادەت، جلم نەئەكردە بەری هیچ مناڵێك تا لە گەڵ دایكەكەیدا تێر لەیەكتریان نەڕوانیایە، هەتا ئەوانەشی كە ئەمردن، هەر پیشانی یەكتریم ئەدان.
تەنها یەكجار عاشق بووم ئەویش ئەو كارگوزارە ڕووخۆشە گورجوگۆڵە بوو، كە ڕۆژانە لە سڕینی وێنەكانی سەرۆكەوە دەستی بە كارەكانی ئەكرد، ئەیوت ئەبێت بەر لە شتنی تەوالێتەكان ئەم دەم و چاوانە بسڕین، پڕ بەدەمی تفی ئەكردە ناوچاوی وێنەكە و ئینجا بە پەڕۆیەك دەستی بە سڕینی ئەكرد، دوای ونبوونی ئەو، وێنەكان لە تۆزدا نوقم بوون، كەس زاتی ئەوەی نە ئەكرد بیانسرێت.
یەكێكی تر لە و مژدانانە وەرمگرت، ئەو كامێرایە بوو كەمنی بە ئەمڕۆ گەیاند، مژدانەی یەكێك لە ئەفسەرە باڵاكان بوو، لە بەرامبەر لە دایكبوونی كوڕەكەی، لە هەمان بەرواری لە دایكبوونی سەرۆكدا بوو، ئەیوت ئیتر ساڵانە لەم ڕۆژەدا هەموو وڵات ئاهەنگ ئەگێڕن.
منیش وێنەی بەڵێنە درۆكانی ئەو كوڕانەم پێگرت كە كچەكان هەرچی كلیلی دەرگای نهێنی بوو ئەیانخستە بەردەستیان، لە خەمی ئەو كچانەدا بووم كەبەناوی عەشقەوە دووگیان دەبوون، چێژی ژانی مناڵبوونیان نەئەكرد، كوڕەكانیش وەك مێروویەكی بچووك ئەچوون بەناخی زەویا، بەدبەخترین مامان بووم دەستم ئەهێنا بە قژیاندا و ئەگریام، ئەموت نەدەبوو ئەمڕۆ ببوایە بە ڕۆژی ڕەشی ئێوە، دەبوو ئەمڕۆ خۆشترین ڕۆژی ژیانتان ببوایە، ئەو لە دایكبوونانە بێ مژدانە بوون، بە گریانی دایكیانەوە ئەهاتنە دونیا. دەبوو وێنەی كوڕە درۆزنەكان بڵاو بكەمەوە كە بەناوی عەشقەوە كچەكانیان فریو ئەدا، وێنەی ئەو پیاوانەی كە خیانەتیان لە ژنەكانیان ئەكرد، شەوانە وێنەكانم هەڵئەدانە ئەودیوی حەوشەكانیان، هەر بەدوای كارەكەمدا چەند ژنێكی دراوسێمان تۆران و تەڵاقدران، كچێك لە باڵكۆنێكەوە خۆی خستە خوارەوە، دوو كوڕ یەكتریان دایە بەرچەقۆ، منیش وەك فەرشێكی كۆن دراوم بەم حەسارەدا تادێت هێرشەكانیان زیاتر ئەبن، منی مامانە میهرەبانەكەی جاران و فیتنە چیەكەی ئەمڕۆ.
گەورەكان بە مناڵەكان ئەڵێن تا كەمێك دەستیان ڕاستتر بگرن و ناوچاوم بپێكن، ژنەكان هاوكاری پیاوەكانیان ئەكەن تا دەرگاكە بشكێنن، تا دێت نەزیفی خوێنی دەم و لووتم زیاتر ئەبێت، جاروبار یەكێك لەزەرفەكان هەڵئەپچڕم و مژدانەیەكیان بۆ هەڵئەدەمە خوارەوە، تا دێت هاوارو جنێوەكانیان دەبنە مەخلوقێكی زەبەلاح، كەكەس نازانێت ڕەچەڵەكی ئەچێتەوە سەر كێ! ئەو مەخلوقەكەی لەگەڵ یەكەم هەناسەیدا منی مامان ئەكاتە پاروویەك، بێكەسانە ئەمرم، وەك تەرمی ژنێكی سۆزانی فڕێمئەدەنە گۆڕێكەوە بێ ئەوەی كەس لە دڵەوە بۆم بگری، ئێستا بیری دایكم ئەكەم، بیری بۆڕەی مانگازەرد، ئەگەر یەكێك لەم ژنانە وەك دایكم میهرەبان بێت ئەمخاتە ژێر عابا ڕەشەكەیەوە و خۆی ئەداتە بەر بەردەكانیان…
لەو سەری كۆڵانەوە ئۆتۆمبێلێك وەستا پیرە ژنێك بە گۆچانێكەوە بەرەو لای حەشاماتەكە دێت، بە توڕەییەوە هاوار دەكات وازی لێبێنن، كچەكەم مناڵی ئەبێت، فریای نەكەوێت ئەمرێت، ئەو دەنگە زۆر ئاشنایە بە ڕۆحم، هەروەك ئەوەی كەسێكی مردوو بێت و ئێستا زیندوو بووبێتەوە، پاڵ بە خەڵكەكەوە ئەنێت، چاوە سەوزەكانی لە چاوەكانی گەلاوێژ ئەكەن، بەڵام گەلاوێژ خۆیەتی هاوار دەكات كچەكەم مناڵی ئەبێت، ئەم نەبێت ئەمرێت.