نێچیروان وه‌لى
ئه‌م ڕسته‌یه ئایه‌تى ژماره (60)ى سووره‌تى ڕه‌حمانه. له‌به‌ر ئه‌وه‌ى نووسینى قورئان نیشانه‌كانى خاڵبه‌ندى تێدا نییه, ده‌نا ئه‌گه‌ر خاڵبه‌ندیى هه‌بووایه, ئه‌وا له كۆتاییی ئه‌م ئایه‌ته نیشانه‌ى پرسیار و سه‌رسووڕمان داده‌نرا, چونكه له ڕووى ناوه‌ڕۆكه‌وه ئه‌م ڕسته‌یه ئه‌وه‌نده‌ى ڕسته‌یه‌كى پرسیارى و سه‌رسووڕمانه, ئه‌وه‌نده ڕسته‌یه‌كى هه‌واڵى نییه, چونكه به سه‌رسووڕمانه‌وه و باسێكى گرنگ بیرى مرۆڤ ده‌خاته‌وه و سه‌رنجى مرۆڤى بۆ ڕاده‌كێشێت.
ئاخر له بارى ئاساییدا پێویست وایه وه‌ڵامى چاكه به چاكه بدرێته‌وه و چاوه‌ڕێى ئه‌مه له خه‌ڵك ده‌كرێت, هه‌روه‌ها ئه‌گه‌ر وه‌ڵامى خراپه به چاكه بدرێته‌وه, ئه‌وا فه‌زیله‌ت و شكۆمه‌ندی و گه‌وره‌ییی ئه‌و مرۆڤه ده‌رده‌خات. ئه‌وه‌ى جێگه‌ى هه‌ڵوه‌سته‌یه و له خودى خۆیدا جێگه‌ى تێڕامانه, ئه‌وه‌یه به‌رسڤى چاكه به خراپه بدرێته‌وه, به‌ڵام ئه‌زموونى ژیان و ڕه‌فتارى هه‌ندێك مرۆڤ ئه‌وه‌ى ده‌رخستووه, چه‌ندان جارى وا هه‌بووه باشه به خراپه وه‌ڵام دراوه‌ته‌وه, بۆیه قورئانیش به شێوازى سه‌رسووڕمان باسى ئه‌و باس و بابه‌ته به بیرى مرۆڤ ده‌هێنێته‌وه, تا به ئاگا بێته‌وه و لێى دوور بكه‌وێته‌وه.
له كاتێكدا ئه‌م باره له كۆمه‌ڵگه‌دا زۆر بووه و په‌ره‌ى سه‌ندووه, بۆیه چووه‌ته ناو په‌ند و قسه‌ى سه‌رزاریی خه‌ڵكه‌وه و عه‌ره‌ب گوتوویانه: اتق شر من احسنت الیه, واته خۆت له خراپه‌ى ئه‌و كه‌سه بپارێزه, كه چاكه‌ت له‌گه‌ڵدا كردووه. نزیك له‌و مانایه‌وه له‌ناو كوردیشدا وتراوه: مار ده‌كوژێ و تووله‌مار به‌خێو ده‌كات, ئاخر تووله‌مار وه‌ڵامى چاكه‌ى به‌خێوكردنه‌كه‌ى به پێوه‌دان ده‌داته‌وه, بۆیه سه‌عدیی شیرازى وتوویه‌تى: افعى كشتن و بچه نگاه داشتن كار خرمندان نیست, واته: مار كوشتن و تووله‌مار به‌خێوكردن كارى عاقڵمه‌ندان نییه.
كه‌سى وا هه‌یه, كه‌سێكى دیكه ده‌ستى گرتووه و له بوار و بابه‌تێكدا سه‌رپێى خستووه, كه‌چى ئه‌م هه‌ر كه ده‌ستى دارى گرتووه, یه‌كسه‌ر به ڕووى ئه‌ودا به‌رزى كردووه‌ته‌وه, بۆیه شاعیرى عه‌ره‌ب (مه‌عنى كوڕى ئه‌وسى موزه‌نى) ده‌ڵێت:
اعلمه الرمایه كل الیوم
فلما اشتد ساعده رمانی
وكم علمته القوافی
فلما قال قافیه هجانی
واته:
هه‌موو ڕۆژێ فێرى ڕم هه‌ڵدانم ئه‌كرد
هه‌ر كه باسكى به‌هێز بوو ڕمى تێ گرتم
چه‌نده‌ش فێره ڕێكخستنى سه‌روام ئه‌كرد
كه شیعرى سه‌روادارى وت هه‌جووى كردم
مه‌حوى له‌مباره‌یه‌وه ده‌ڵێت:
هه‌ر ئه‌و كه‌سه‌ى كه خه‌یرى دوعاى خه‌یرى دیوه لێم
دائیم دوعامه شه‌ڕڕى له من لا بدا خودا
شاعیر له ڕوانگه‌ى كۆمه‌ڵایه‌تییه‌وه بۆ ئه‌و باره ده‌ڕوانێت و به نیازى ئه‌وه نییه, ئه‌و كه‌سانه‌ى ئه‌م دوعاى خێرى بۆ كردوون, له‌گه‌ڵى باش بن و چاكه‌ى له‌گه‌ڵدا بكه‌ن, به‌ڵكوو دوعاى ئه‌و بۆ ئه‌وه‌یه خودا له خراپه‌ى هه‌مان ئه‌و كه‌سانه دوورى بخاته‌وه, نه‌كا تووشى خراپه و گرفتارى بكه‌ن.
حاجى قادریش ده‌ڵێت:
به سه‌د خوێنى جگه‌ر فێرى نیاز و ناز و عیشوه‌م كرد
كه‌چى ئیستا كه ده‌مبینێ ده‌ڵێ سا لا چۆ به‌و لاوه
شاعیر گله‌یی له بێمروه‌تی و بێوه‌فاییی یار ده‌كات و ئه‌وه به‌بیر ده‌هێنێته‌وه, كه چه‌ندان هه‌وڵى له‌گه‌ڵ داوه تا فێرى ناز و ڕازى كردووه, كه‌چى ئێستا ئه‌و كه‌سه‌ى پێى ده‌ڵێ بڕۆ و لێم دوور بكه‌وه.
هه‌موو ئه‌مانه وامان لێ ده‌كه‌ن بڵێین: ئه‌رێ مه‌گه‌ر پاداشتى چاكه هه‌ر چاكه نییه؟!
https://www.seameo-innotech.org/mt4t/members/kamagra-100mg/ order kamagra oral jelly