نوێنه‌ری خوا

وه‌رگێڕانی: كه‌تان خادیمی
ئیمام و خه‌تیبی مزگه‌وتێك بووم، ژنێك هه‌موو ڕۆژانێكی هه‌ینی له‌به‌رده‌رگای مزگه‌وت ئه‌وه‌ستاو ئه‌پاڕایه‌وه‌ و به‌زۆر پاره‌ی له‌خه‌ڵك ئه‌سه‌ند. له‌ ڕۆژانی هه‌یینیدا دوای نوێژ ئه‌و له‌به‌رده‌رگای مزگه‌وت وه‌ك دره‌ختێك ئه‌ڕوا، ئه‌پاڕایه‌وه‌ له‌نوێژ خوێنان.
منیش پرسیارم له‌باره‌یه‌وه‌ كرد، كه‌س نه‌یئه‌ناسی، زانیم كه‌ نوێژ خوێنان بێزار ئه‌كات و ناچاریان ئه‌كات پاره‌ی بده‌نێ.وتم: به‌ جه‌ماعه‌تی مزگه‌وت پاره‌ی مه‌ده‌نێ، باواز بێنێت.
ڕۆژی هه‌ینی خوتبه‌ ته‌واو بوو، منیش له‌ده‌رگای ئیمامه‌وه‌ ئه‌ڕۆشتمه‌ ده‌ره‌وه‌، ده‌نگی ژنێك به‌شێوازێك بانگی ئه‌كردم …. هۆوو تۆ.. بۆسته‌.. ئاوڕم دایه‌وه‌ له‌گه‌ڵ منی بوو، ئه‌و ژنه‌ ده‌رۆزه‌كه‌ره‌ بوو، وتم: فه‌رموو خوشكم، به‌ توڕه‌ییه‌وه‌ وتی: بڕوانه‌ جاران خه‌ڵكی پاره‌یان ئه‌دامێ ئێستا نایده‌ن، تۆ پێت وتوون هاوكاریم نه‌كه‌ن، به‌خوا به‌خوا… له‌ماڵه‌وه‌ مناڵی وردم به‌جێهێشتوون، كه‌س نیه‌ مه‌سروفیان بكات، هاوسه‌ره‌كه‌م وه‌فاتی كردووه‌، منیش ده‌سته‌پاچه‌م و هیچ ئیش و كارێك نازانم، ناشتوانم به‌جێیان بێڵم و بڕۆم بۆكار… ته‌نها ڕۆژانی هه‌ینی نه‌بێت لای دراوسێكان به‌جێیان دێڵم ئه‌وانیش وه‌ك خۆم هه‌ژارن، ئه‌ویش ته‌نها به‌م كاته‌ كورته‌ ئه‌وه‌ی به‌ده‌ستی دێنم سه‌رفی ئه‌كه‌م تا هه‌فته‌ی داهاتوو.. تۆ بوویته‌ ڕێگر له‌و خێره‌ی خه‌ڵك و من و مناڵه‌كانیشت بێ به‌ش كرد…
وتم: خوشكی خۆم ئه‌گه‌ر منیش و خه‌ڵكی تریش پاره‌ت بداتێ، تۆ هه‌ر به‌ سواڵكه‌ری ده‌مێنیته‌وه‌، ئایا داوات له‌خوا كردووه‌ به‌رله‌وه‌ی داوا له‌خه‌ڵك بكه‌یت؟ یان به‌رله‌وه‌ی بڕۆیته‌ به‌رده‌رگای خه‌ڵك چوویته‌ به‌رده‌رگای خوای گه‌وره‌؟
ژنه‌ش وتی: من خودا ئه‌په‌رستم و نوێژئه‌كه‌م .وتم: وه‌ك چۆن داوا له‌خه‌ڵك ئه‌كه‌یت و به‌و شێوه‌یه‌ داوا له‌خودا بكه‌… سونه‌ته‌كان جێبه‌جێ بكه‌،وه‌ ئه‌وه‌ش بزانه‌ ئه‌وه‌ی ڕزق و ڕۆزی زیاد ئه‌كات زیكری (استغفرالله)یه‌، تا ئه‌توانیت ئه‌م زیكره‌ بخوێنه‌، پاشان( لاحول ولا قوة‌ الا باالله) به‌خوای گه‌وره‌ قه‌سه‌م ئه‌وه‌نده‌ ڕزقت به‌سه‌ردا ئه‌ڕێژێت نه‌ژمێرێت، به‌مه‌رجێك له‌خودا بترسیت به‌نهێنی و ئاشكرا، له‌دڵه‌وه‌ زیكره‌كان بخوێنیت، وه‌ ئه‌م (استغفرالله) یه‌ بتوانیت مناڵه‌كانیشت له‌گه‌ڵت ئه‌نجامی بده‌ن…
ژنه‌كه‌ ڕۆشت و بڕیاریدا به‌درێژایی ئه‌و هه‌فته‌یه‌ به‌رده‌وام بێت له‌زیكرو (استغفرالله) بخوێنێت.
بۆ هه‌ینی داهاتوو ژنه‌كه‌ نه‌هاته‌ به‌رده‌رگای مزگه‌وت و دیار نه‌بوو كه‌س نه‌یبینی… هه‌فته‌ی دووه‌م و سێیه‌میش به‌هه‌مان شێوه‌ نه‌هاته‌وه‌ به‌رده‌رگای مزگه‌وت.. بوو به‌خه‌مم زۆرم حه‌زئه‌كرد هه‌واڵی بزانم، گه‌ڕام تا ناونیشانه‌كه‌یم به‌هه‌ر شێوه‌یه‌ك بێت ده‌ستكه‌وت، گه‌شتمه‌ كۆڵانه‌كه‌ی هه‌واڵیم له‌دراوسێكه‌یان پرسی، وتیان: خۆی و مناڵه‌كانی ڕۆشتن و سه‌فه‌ریان كردووه‌.
وتم: ئه‌و هه‌ژار بوو توانای سه‌فه‌ركردنی نه‌بوو. وتی: تۆ ئیمامی مزگه‌وته‌كه‌ نیت ؟ ئه‌وه‌ی تۆ پێت وتبوو ئه‌نجامیدا پابه‌ندبوو به‌زیكری (استغفرالله)و (لاحول ولا قوة الا باالله)له‌خوا ئه‌ترساو به‌نهێنی و ئاشكرا، مناڵه‌كانیشی هه‌موویان ئه‌م زیكره‌یان ئه‌خوێند…هه‌ر له‌و كاته‌دا كوڕه‌ مامێكی هات ماره‌یكردوو ڕۆشتن، ئه‌و كوڕه‌ مامه‌ی یه‌كێكه‌ له‌ده‌وڵه‌مه‌نده‌كانی (ریاض) هه‌تا له‌ده‌وڵه‌مه‌نده‌كانی سعودیه‌شه‌، هه‌رچه‌نده‌ زۆر ده‌وڵه‌مه‌ند بوو، به‌ڵام له‌ژیانیا هاوكاری نه‌كردبوون.
ژماره‌ی هاوسه‌ره‌كه‌یم وه‌رگرتوو په‌یوه‌ندیم پێوه‌كرد.. پرسیارم له‌باره‌ی ئه‌و ژنه‌وه‌ لێكرد، زۆری پێخۆش بوو وتی: تۆ فڵانه‌كه‌سی ئیمامی مزگه‌وته‌كه‌؟ خێزانم چیرۆكی تۆی بۆ گێڕاومه‌ته‌وه‌، سوێند به‌خوا نه‌بیرم لێكردۆته‌وه‌ نه‌ له‌خه‌یاڵما بووه‌ ماره‌ی بكه‌م، هه‌رنه‌شم ئه‌ناسی.. شه‌وێك له‌شه‌وه‌كان خه‌وتبووم، یه‌كێك هات توند خه‌به‌ری كردمه‌وه‌ و ئه‌یوت: بڕۆ بۆلای فڵانه‌كه‌س و چاودێری مناڵه‌كانی بكه‌ و هاوكاریان بكه‌ له‌وه‌ی خوا پێیبه‌خشیویت…خه‌به‌رم بوه‌وه‌ ناوه‌كه‌م له‌بیر بوو پرسیارم له‌دایكم و خوشكه‌كانم كرد، وتم: ئه‌مه‌ كێیه‌؟ وتیان ئه‌وه‌ فڵانه‌ كه‌سه‌ بێوه‌ژنه‌، كه‌سیان نیه‌ بژێویان بۆدابین بكات، خزمی باوكته‌و له‌فڵانه‌ شار ئه‌ژی.. له‌گه‌ڵ دایكمدا ڕۆشتین زۆرێك له‌خواردن و پێویستیمان بۆكڕین و سه‌ردانمان كردن.. كه‌چوومه‌ ژووره‌وه‌ وتم: ئه‌وه‌ خوا ئه‌وه‌ی بۆناردوون، سوێند به‌خوا نه‌متوانی بخه‌وم تانه‌هاتم بۆلاتان.. چیتان كردووه‌ وا خوا منی نارده‌ لاتان؟ ژنه‌كه‌ وتی: ئیمامی مزگه‌ته‌كه‌ داوایلێكردین پابه‌ندبین به‌زیكری(استغفرالله ولاحول ولا قوهة الا باالله). كه‌ هاتینه‌ ده‌ره‌وه‌ سواری ئۆتۆمبێله‌كه‌ بووم، به‌رله‌وه‌ی پێ به‌به‌نزینا بنێم، دایكم وتی: به‌خوا ژنێكی ساڵحه‌ و جوانیشه‌ كوڕم ناتوانیت نه‌فه‌قه‌ی بكێشیت. وتم: دایكه‌ بگه‌ڕێوه‌ خوازبێنی بكه‌، ئه‌ویش ڕازی بوو ماره‌م كردوو، ئێستا له‌گه‌ڵ مناڵه‌كانی له‌گه‌وره‌ترین و به‌رفراونترین ڤێلاكانی سعودیه‌یه‌.
*ئه‌م چیرۆكه‌ له‌لایه‌ن (حفیض الدوسری)ه‌وه‌ وه‌رگیراوه‌