25خووی کەسانی سەرکەوتوو

دیدار کەمال

1-   بەرپرسیاریەتی تەواوی ژیانیان هەڵدەگرن، خۆیان لە ئەرکەکانیان ناشارنەوە، بە گرنگییەوە کارەکانیان جێبەجێ دەکەن، شکستەکانیان ناخەنە ئەستۆی کەس و بۆڵەبۆڵ ناکەن، و دەرئەنجامی کارەکانیان ئەگرنە ئەستۆ.

2- ئەزانن کارە لە پێشینەییەکانیان کامانەن، دەست بۆ کارێک نابەن کە گرنگ نەبێ هەتاوەکو کارە گرنگ و لە پێشینەکان تەواو نەکەن.

 3- ئامانجی ڕۆژانەی خۆیان دائەنێن، پلانی رۆژانەیان هەیە کە پێویستە چی بکەن لەو ڕۆژەدا.

4- گرنگی بە لایەنی ڕۆحی ئەدەن، لە هەر دینێکدا لایەنی ڕۆحی بە شێوەیەک پەرە پێدەدرێت بۆنموونە(نوێژکردن، قورئان خوێندن، نزاکردن، خوێندنەوەی ئینجیل،  یۆگا… هتد)

٥ – گرنگی بە تەندروستی و وەرزش کردن دەدەن، و خواردنی تەندروست دەخۆن

٦ – دەخوێننەوە و فێردەبن، بە شێوەیەکی بەردەوام، کتێبی سوود بەخش دەخوێننەوە.

٧ – کۆنترۆڵی خۆیان دەکەن، زاڵ ئەبن بەسەر خوەکانیاندا بۆ نموونە لە کاتی خوێندن و کۆششدا مۆبایل و تەلەفیزیۆن ئەکوژێننەوە.

٨ – بەردەوامی یەکێکە لە سیفەتی کەسە سەرکەوتووەکان، زوو بێزار و ماندوو نابن( بۆ نموونە ئەگەر بتەوێ فێری شتێک ببیت یاخود خوی پێوە بگریت ئەوا ٢١ ڕۆژ بەردەوام ببە و ئەبێت بە خوو لە ناختدا.

٩ – بە دوای ئەو شتەوەن کە ئەیڵێن، پەیمان شکێن نین و زوو سارد نابنەوە لە ئەو کارەی کە گرتویانەتە دەست.

١٠ – لە شکست ناترسن، شکست و دۆڕان فێریان ئەکەن کە ئەم ڕێگایە کار ناکات و ئەبێت ڕێگایەکی تر تاقی بکەنەوە.

١١ – ڕۆژانە پراکتیزی لێهاتووییەکانیان ئەکەن و گەشەی پێئەدەن جا لە هەربوارێکدا بێت (نوسین، وەرگێڕان، موزیک، نیگارکێشان،هونەری جەنگی….هتد

١٢ – هۆشیارن لەبارەی خۆیانەوە، خاڵە لاواز و بەهێزەکانی خۆیان ئەزانن.

١٣ – ڕوو خۆش و قسە خۆشن، لەگەڵ ئەوەشدا جدین.

١٤ – سیستمی سوپاسگوزاری پەیڕەو ئەکەن، سوپاسی ئەو کەسانە ئەکەن کە یارمەتییان ئەدەن، سوپاسگوزاری خوداو خێزانەکانیان و هاوڕێکانیان .

١٥ – بەو کەسانە دەورەدراون کە ژیر و هۆشیار و ڕۆشنبیرن و وەک خۆیان بیر ئەکەنەوە، وتەیەک هەیە ئەڵێت:( تۆ ڕەنگدانەوەی ئەو کەسەی کە زۆربەی کاتەکانتی لەگەڵ بەسەر ئەبەی) بۆیە ئاگادار بە کە هاوەڵی کێ ئەکەی.

١٦ – سیستمێکی پشتیوانیان هەیە کە پێکهاتووە لە خێزان و هاوڕێکانیان.

١٧ – کەسانی دووربینن و خاوەن ئامانجی درێژخایەنن( تەنها ئامانج دانانێن بەڵکو پلانی ورد بۆ گەشتن بە ئامانجەکەیان دائەنێن.

١٨ – کۆنترۆڵی هەستەکانیان ئەکەن، و خۆیان لەو هەستانە دوور ئەخەنەوە کە خزمەتیان ناکەن وەک هەستی توڕەیی و بێزاری و ڕەشبینی…هتد.

١٩ – پەیوەندی بەستنیان بەشێوەیەکی ڕوونە، کاتێک قسە ئەکەن دڵنیان و ناترسن و ئەزانن باسی چی ئەکەن.

٢٠ – گوێگرێکی باشن، ئەتوانرێت پشتیان پێببەسترێت و یارمەتی دەر ئەبن لە چارەسەرکردنی کێشەکاندا.

٢١ – گرنگی بە کاری تایبەتی خۆیان ئەدەن، بە تەنها دائەنیشن و بیرئەکەنەوە، ئەمەش وایان لێئەکات ڕۆژانە پێداچوونەوە بە کارە باش و خراپەکانیاندا بکەن.

٢٢ – هەمیشە هەلەکان دەقۆزنەوە و چاوەڕێی کاتی گونجاو نین، چونکە پێیان وایە هەر هەلێک یەکجار دێتەپێش.

٢٣ – ئەو گەشتەیان خۆشئەوێ کە ئەیگرنەبەر زیاتر لە ئەنجامەکە، کەسانی سەرکەوتوو چێژ لە هەر هەنگاوێک وەرئەگرن کە هەڵیئەگرن ( زۆرجار بەهۆی پەلەکردن بۆ گەشتن، نیوەی چێژی ڕێگا لە دەستدەدەین.

٢٤- وشەی ناتوانم و نازانم لە فەرهەنگیاندا بوونی نیە، چونکە پێیانوایە بە هەوڵدان و خۆ ماندووکردن فێردەبن.

٢٥ – گرنگی بە کات ئەدەن لە کاتی دیاریکراودا ئامادەی کۆبوونەوە و بینینەکان دەبن، چونکە کات لەلایان بەنرخە.

لە کۆتاییدا مەرج نییە هەموو خاڵەکان لەیەک مرۆڤدا بوونی هەبێت، بەڵکو دەکرێ هێدی هێدی و لەسەرخۆ خاڵەکان بۆ ژیانمان زیاد بکەین.