كۆرۆنا
مناڵانى له خه‌م گرت
خه‌یاڵى له فڕین خستن
له خه‌ون خاڵیى كردنه‌وه
گۆرانیه‌كانى برده‌وه به گه‌روویانا
(ئه‌و گۆرانیانه‌ى ژیان له نه‌بره‌كانیانه‌وه ده‌ست پێده‌كات)
زه‌نگى وانه‌كانى لێگۆڕین به زه‌نگى مه‌ترسیى
له هه‌ناسه‌یه‌كا ده‌فته‌رى (ڕه‌سم)ى پێ پێچانه‌وه
وه‌ك درنجێ، ده‌رگاى (مه‌كته‌ب)ى كڵۆمدا به ڕوویانا..
كۆرۆنا
لاوه‌كانى له پیرێتیى هه‌ڵكێشا
پیره‌كانى بۆ مردن برد
مردووه‌كانى ته‌نگه‌تاو كرد
به‌ڕه‌ى له ژێر پێیان ڕاكێشا…
كۆرۆنا
خه‌ریكه ڕۆشنایى سیماى پیران له ژیان بگرێته‌وه
ڕوانینه كزه‌كانیان ده‌رزییئاژن ده‌كات
له‌رزینیش به ده‌سته‌كانیان ڕه‌وا نابینێ
گۆچانه‌كانیان ده‌كرۆژێ‌و به ڕووى زه‌مینا ده‌یانخات..
كۆرۆنا
شیوه‌نى جارانى له بیر دایكان برده‌وه
چه‌مه‌ریه‌كى غه‌ریبى خسته سه‌ر زمانیان
به‌ردیش به فرمێسكه‌وه بۆى ده‌سه‌ندنه‌وه…
دایكم خۆى ساڵانێ بوو هه‌ناسه‌ى سه‌ناعیى وه‌رده‌گرت
كه‌چى ده‌یوت:
ئه‌م هه‌ناسانه‌ش به به‌رى ئێوه‌دا ده‌كه‌م
تۆش ده‌پاڕایته‌وه:
هه‌ر ئه‌م جاره
هه‌ر ئه‌مجاره ده‌رگاكه‌ى دایكم دانه‌خرێ
ئه‌و ده‌رگایه‌ى نیوه‌شه‌ویش له سه‌ر پشته
هه‌ر ئه‌مجاره چاوه‌ڕوانیه‌كانى هه‌ناسه‌یان لێنه‌بڕێ..
كۆرۆنا
ده‌یه‌وێ قوربانیه‌كانى ده‌ستى، نوێژێكیان له سه‌ر نه‌كرێ
تاك‌و ته‌نیا خۆیان بكه‌ن به گۆڕستانا
ماته‌مگێڕان سوره‌تێكى سه‌بووریى نه‌بیستن
كۆرۆنا وا ده‌ست ده‌وه‌شێنێ، گۆڕه‌كانیش ته‌نیاتر بكا
ده‌یه‌وێ ئۆباڵى هه‌موو مردنه‌كان له ئه‌ستۆ بگرێ..
كۆرۆنا سه‌ردێڕى هه‌واڵى به ڕه‌شایى سواغدا
(ئیننا لیللا…)ى كرد به وێردى سه‌ر زمان
فریاى ئاماژه‌یه‌كیش بۆ دڵدانه‌وه ناكه‌وین
كۆرۆنا مه‌دارى پێكه‌وه‌بوونى تێكوپێكدا..
كۆرۆنا
بۆنێكى تیژى ته‌نیایی ڕشت به سه‌رزه‌مینا
حوزنێكى خه‌ستى به‌ردایه زه‌مان
قسه‌كردنى به هه‌لوه‌سه داپۆشیى
نیگه‌رانیى گه‌یانده بناوانى گیان
به‌خێرهاتن‌و خواحافیزیى له بیر بردینه‌وه
غه‌ریبانه هه‌نگاوى پێهه‌ڵده‌گرتین
ڕوانینمان، ڕوانینى مردوویه‌ك بوو له پێش هه‌زار ساڵه‌وه گه‌ڕابێته‌وه
مردوویه‌ك ڕوو بكاته‌وه گۆڕستان..
كۆرۆنا بیرى خستینه‌وه
هه‌ناسه چه‌ند له ژیانى ئێمه‌وه نزیكه
ئێمه چۆن بووینه‌ته كۆرۆنا بۆ هه‌ناسه‌ى سروشت
سروشت چه‌ند به كوڵ دوعا ده‌كا له كۆڵى ببینه‌وه…
كۆرۆنا
تاجیره‌كانى خوێنى كرد به شه‌ریكى خۆى
ویژدانى شه‌قوشڕتر كردن
فڕان فرانى خسته‌وه ناو
كلیلى بازاڕى دایه ده‌ست بایه‌قوش
قاتیى جه‌نگه گه‌وره‌كانى هێنایه‌وه به‌رچاو..
كۆرۆنا
به‌و هه‌موو مه‌رگه‌وه هاتووه
ئێمه‌ش ئێسكوپروسك به ده‌ره‌وه
ده‌رگا‌و په‌نجه‌ره‌ى جه‌سته‌مان دانه‌خرا‌و
كۆرۆنا بۆ خنكاندنمان په‌ل ده‌هاوێ
ئێمه‌ش خۆمان خنكاوى خه‌یاڵى خاو…
كۆرۆنا ده‌یبینى:
لێره هه‌وا به چ ده‌ردێ براوه
ژیان له چه‌ند لاوه مردووه
ده‌یبینى؛
پێش خۆى كۆرۆناى تر خراپ زه‌فه‌رى به‌م وێرانه‌یه بردووه..
كۆرۆنا پاش ئه‌و هه‌موو ڕێگه‌بڕینه خه‌ریك بوو بگه‌ڕێته‌وه
تا نیوه‌هه‌ناسه‌كانى (هه‌ڵه‌بجه)و
پاشماوه‌كانى (ئه‌نفال)و
تاساوه‌كانى بن ده‌ستى خۆمانى دۆزییه‌وه..
كۆرۆنا كه هات
ئێمه له په‌راوێزى مانونه‌مانا كه‌وتبووین
جێگه چنگى خۆكوشتن به گه‌ردنمانه‌وه سوور ده‌چۆوه
غه‌در ته‌نگه‌نه‌فه‌سى كردبووین..
كۆرۆنا كه هات
(پیاوانى وڵات) په‌نجه‌یان بۆ گۆڕستان ڕاكێشا بۆ خۆپاراستن
ڤایرۆسانه‌تر ده‌ستیان له (قووت)ى مه‌مره‌‌و مه‌ژى وه‌شاند
كۆرۆنا كه هات
ده‌مێك بوو
ڤایرۆسى ده‌مى ئه‌وان به‌رببووه هه‌ناسه‌مان
سیاسه‌تیان سیلى پێكردبووین
ده‌مێك بوو
خۆمان له خۆڵى بێچاره‌یی ده‌گه‌وزاند..
كۆرۆنا مه‌رگى به قه‌باره‌یه‌كى گه‌وره‌وه هێنا
به‌ڵام ده‌بێ دوایى مه‌رگ خۆیشى ببا
ده‌بێ ده‌ورانى ده‌ركه‌وتنیشى هه‌ڵپێچێ
ئاخر مه‌رگ كه‌س ناناسێ، ته‌نانه‌ت حه‌ماڵه‌كانیشى
مه‌رگ نه‌بوایه
ئێستاش ڤایرۆسه كوشنده‌كانى ئه‌وسا
(هۆلاكۆ)، (جه‌نگیزخان)،
(نیرۆن)و (فیرعه‌ون)كانیش له‌نێومانا ده‌بوون
مه‌رگ نه‌بوایه ئێستاش ئه‌وان به گژ ژیاندا ده‌چوون..
ئه‌وه‌ى له دواى كۆرۆناوه به‌جێماوه
جێگه‌پێى جه‌نگاوه‌رانى سه‌نگه‌رى هێڵى ئاگریین،
هه‌ناسه‌ى فریشته‌ى خۆبه‌خش‌و
ترپه‌ى دڵى خێرخوازانه
ئه‌و هه‌ناسه‌‌و ئه‌و ترپه‌‌و جێگه‌پێیانه پێمانده‌ڵێن:
ئاوازى ژیانێكى تر
ڕۆشنایی دنیایه‌كى نوێ له ئاسمانه‌وه داده‌گرین.
ــــــــــــــــــــــــــــــــــــــ
پێشكه‌شه به گیانى پاكى شه‌هیدانى ده‌ستى كۆرۆنا، به تایبه‌ت ئه‌وانه‌یان له سه‌نگه‌رى پێشه‌وه‌ى ڕووبه‌رووبوونه‌وه‌دا له‌گه‌ڵى جه‌نگان‌و به به‌خشینى گیانى خۆیان گیانى ئێمه‌یان له مه‌رگ ڕزگاركرد.
ـــــــــــــــــــــــ
نوسەر / نەبەز هەورامى
