ڕۆژ هەڵەبجەیی
کە سەیری دنیا دەکەین، بێ ئاگا لەوەی
دنیا هیچە، لە هیچەوە سەر دەنێتەوە،
قەترەیک ڕووناکی شک نابەین..گوناه بەرنەدەینەوە ،
تۆ سەیرکە بێ عیشقی چی دەکا،
ئەوە ڕێڕەوی ڕووبارەکانن ئاوڕ نادەنەوە..
ئەوە ئێمەین ئاو بە فەلسەفەوە ناخۆینەوە،
ڕێییان پێدەگرین بچنە لافاوی هزرەوە..
چیاکان واتای سەر لەقاندن نازانن،
ئەوە ئێمەین نەوەی قابیل،
لە نەزیفی تاریکییا نوقمین، سەریان بائەدەین،
بڕۆنە تەپووتۆزی زەمەنەوە..
ئەوەندە تاریکیم بینی بەدەست و پەنجەکانم وت/تکایە بێدەنگی دنیا پێچی یادگارییە،کە دەڕوات ئیتر نایەوە..
لە دووری ئەم ڕوانینەوە ،
مەحەبەتم درزی بردووە،
درەنگە بگەمەوە ئەوسەری ئیشراقێک بشنێتەوە،
گوڵ کە سیس بوو،
زبڵخانە چاو دەکاتەوە..
هەمووی خەتای مەحەبەتە ،کە نیمانە
چی لەم هەموو ئیمانە بکەم،
سەرم دەپێچێ بە نووچ،
هەر خول دەخۆم خولگە خولگە
خولێک لە هیچەوە هیچ !
کە پیاچوونەوەیەک بە لاپەڕەکانی بەرائەتا هەڵدەچنم
بینینم بە تەمی مەحەبەت
قورس بووە ،
کەچی لەنزیک ڕۆحی پرتەقاڵیمەوە،
بە سیمایەکی دوور دەڵێم/ئاگات لە مەحەبەت بێت،
لە دەست و پەنجەکانت بەرنەبێتەوە،
ئەم ئیشراقە ئێشی زۆرە،
کە شکا و هاڕەی کرد ،ئیتر نایەتەوە !
- * *
هەمیشە ڕێگایەک وندەکەین و
یەکێکی تر دەدۆزینەوە..
ئەو ڕێگایانەی ونمان کرد،
ڕاستە تەریب بوون بە یەکتر..لێ لە
کۆتایی ئەو ونبوونەدا
هەر ڕێگایەک دێتە گۆ ،
ئیشراقێک بڕوێنێ،
پێڵاوی شەوزەنگ درز بەرێ،
ئەم ڕۆشتنە دەمباتەوە لای
کەسێکی شەرابی،
کە تەریبە بە ڕۆحم و نزیکە لە مەوجدانی دڵم !
وامزانی لەتێک لە سێبەرمە،
لە حوزنما هاوسەفەرمە..
کاری سەرابە چاوەکانمان تینوو دەکا،
گەمژەییە هەر بە دوای ئاوا وێڵین،
ئاو کە چووە ناو کەشتی،
گومان چ کارەیە؟
یەقین ڕێگەیەکە بژاردەی مردن..
من ئەم عیشقە ،کە دەدۆزمەوە،
سەرم بە ئەڵقەی ئەلفێکەوە نابەستم،
مەودایەک هەیە قفڵ ڕێژ،
لێ شێتانە بۆی دەگەڕێم..
من گەڕانم چەشنی ئاوە،
ئەو نغرۆ بوون بە تراویلکە !
چ ئەفسانەیەکە شیعر هەر بە باڵی غەزەلدا بفڕێ،
چاوی ئاسمانێکی نەبێ لە نوقتەوە،
بگاتە دەنگی دێڕ..
ئەڤین چ خەراباتێکە،ئاشق دوورە،
لە پێناسی مەعشوق و
بگاتە کەشفی فیراق ..
لامی ئەم لاولاوە چەند ئاڵۆزە ،
پێچاو پێچە میزاجی ،
دەلاقەیەکی نییە بگاتە ،
سەرە داوێک لە ئیشراق !
* * *هەر شتێک لە تاریکیدا هەنگاوی نا،
لە ڕووناکیا بۆی مەگەڕێ..
پێی وتم/لە دڵدا بۆی بگەڕێ ،
بێ ئاگا دەستم بۆ دڵم برد،
لێ لە شکانی شعورا،
شوێنێکم دانا بۆ پەشیمانی..
مردن کە بە تەریق بوونەوەدا دەڕوات،
دڵ دەبێتە تای تابووت !
خودایە من تەنها لە ڕوانینێکی دوورا
مەحەبەتم پڕکرد لە گەمەی مناڵی !
ئەو بە خودی ئیشراقەوە،
بەریدایە کەفی دەریا..
پێم وتم /ئەی کاشیفەی فیراقم
چ گرنتییەکم پێ ئەدەی،
تا نەگەمە جەنگی دڵ کوشتن،
لە چ خەمێکدا هاوبەشمی،
تا دیواری ئەم ئاسمانە هەڵچنم،
بە ڕەنگاڵەی فڕین !
لە چ ئەشکێکی مناڵانەمدا هاوڕێمی،
تا گریانی بووکە شوشەکان ،
بگۆڕم بۆ پێکەنینێکی ئەزەلی..
بە تەفسیری چ ئومێدێک ڕامدەژەنی،
تا لە قوڵایی بەهانەیەکی مێخۆشدا
جیلوەی تەجەللایەک بچنم ،
لە تەونی تاریکی..
سەرم مەشێوێنە بە ،
مەعریفەی ئەم پرسیارانە،
کە خۆم نازانم لە چ پرسیارێکدام ..
پرسیار داری مەعریفەیە، بەم سەرەگێژەمەوە
دارێک شک نابەم دارە، دارەی پێبکەم..
ئەزیزم بەم هەموو تێکشکانەی شیعرمەوە،
شێتییەک ئەزبەر دەکەم ،
تا ئەوپەڕی هەڵخلیسکان ،
نە مەیخانەم دیوەو نە پەنجەی ساقی بە پێکەوە
لێ پڕم لە خەرابات و ئەبجەدییەتی
ئەو حەرفانەی نەبیراون لە گریانی شەرابەوە..
ئیلاهی زەڕەیەک ڕووناکی بخەرە دەفری کاڵفامیم…
کە من لە مەحەبەت بەتاڵ و
لە هێشووی دڵمەوە ،
ڕێنووسی کەندو لەند دەنووسمەوە..
خۆ وتم /هەر شتێک لە تاریکییا هەنگاوی نا،
لە ڕووناکییا بۆی مەگەڕێ !
* * *لە دووری ڕوانینێکەوە،
بڕوا بەچاو مەکە،
بینین هەر خەستی خەیاڵێکە..
من لە ناسینی تۆ نە پێکەنینی پێکم ،
نە خولگەی عاتیفە..
کە بارانی جەفا هەڵیکرد ، تۆ وتت/مەرحەبا..
خودایە دڵ چ تووشبوونێکە ،
ئەم هەموو دڵە چییە لە کۆپییەکی شکستەدا ، شکست دەخوات ؟؟
من خەیاڵدانم خاکی بووە،
کونجی پیربوون تاریکییە،
خۆڵ کەلتووری کوژانەوە!
مرۆڤ کە دەکوژێتەوە، لە پەراسوویەوە خۆڵ پێدەکەنێت،
پێستی تاریکی تەریقەتی ماڵی..
بیرت بێت ئەی مەرحەمەتی دڵم،
مەرگ لە یەخەی هەموواندا نووستووە
مەرگ ئەو کاتە کارەساتە،
دڵ لە دوا ترپەدا عیشق لێ نادات..
تۆ کە مەلەوانی دەریای عیشقستانی،
لێ هێشتا نامۆی بە شەمع و پەروانە..
ڕیزکردنی ئەم هەموو دڵە لە پای چی؟
بە باڵی فەلسەفەدا دەفڕیت،
کەچی هێشتا لە کۆڵانی ئاسمانێکدا،
شەقژنت دانەگیرساوە !
ئەم هەموو قافییەی دڵە بۆچی!؟
ئیلاهی لە کاتژمێری سفرەوە دێمەوە،
ئەم هەموو پاییزی عیرفانە،
چ ئۆقیانووسێکە شەپۆل دەدات،
لە نەسلی عەدەم !
گوڵەکانی ئینجانە کەی جوانن،
لە باخچەدا ڕۆشتوون ،
بۆنیان هەر بۆ ماڵێکە ؟
ئەم بولبولانە بۆ نابینا بوون، لە کاتێکدا
چەهچەهەیان تابلۆی نەخشی ،
سەر دیوارێکە؟
خودایە شوناسی ئەو ئیشراقە،
لە کوێ بێنم ماڵی گوڵ ئاشت بکاتەوە
بە باخچە..چاوی بولبول ،
تیمار بکا بە چەهچەهە !
ڕۆحی منیش زاخاو بدا بە ،
توحفەی میناکانی میتافۆر..
گۆزەیەک لە غەزەلی شێتانەی،
لەسەر شانی کلاسیکەوە،
تل بکەمەوە بۆ کەمەری مۆدێرنە،
شەو هەڵپاچم ، ئەستێرە بگرمەوە !
خۆ وتم / لەدووری ڕوانینێکەوە ،
بڕوا بە چاو مەکە
هەر خەستی خەیاڵێکە،
خەیاڵدان خامۆش و لە یەخەی،
فاتێحەیەکدا کاڵبوونەوە !
ڕۆژ هەڵەبجەیی
ئەماژەی پێدەدەم ئەم قەسیدەیە لە فێستیڤاڵی ژنان لە هەڵەبجە خوێندمەوە..پێم وایە ئەم قەسیدەیە ڕۆحمی وردو خاش کرد، بەڵام توانیم خۆشەویستی جەماوەری ئەدەبی ببمەوە..
