ماڵەکانمان شوناسی ئێمەن

شاتوو محمود عبدالعزیز خوێندکاری قۆناغی چواری تەلارسازی

هەموو ماڵێک خاوەنی هەست و حاڵی تایبەت بە خۆیەتی کە جێیەکی تر جیاوازە لەو ،خاوەنی بۆن و بەرامەی خۆیەتی، ئەزمون و هەستی ئێمە جیاوازە کە ئەچینە ناوی و هێمنی و شنەیەکی تایبەتی هەیە کە دڵ هەستی پێئەکات ، بەتایبەت ماڵەگەورەکان ماڵی باپیر و پوور و …..، هەمیشە جەوێکی تایبەتی هەیە کە بۆنی چێشتەکەیان یەت یان چاییەکەیان یان بۆنی میهرەبانی و دڵنەرمی خۆیانە و تێکەڵ بە سەوزایی و فێنکی ئینجانە گوڵەکانیان ئەبێت ،ماڵەکانمان جێی دڵئارامی و سکونەتی ئێمەن ، ماڵ بە هەڵواسینی تابلۆ و کەل و پەل و پەردەو فەرش نابێتە ماڵ ، بەڵکو بەحزووری ئەو کەسانەی ناویەتی کە یەن و ئەڕۆن و هاتوچۆئەکەن مانا پەیائەکات ، هەتاوەکو ئەو کەسانەی کە ئێمە ئاسودەین پێیان و ئەزیزن لامان هاتوچۆ بکەن ئەو فەزایە زوتر ئەگۆڕێ بەو جێگایەی کە مەفهوومی ماڵی تیایە، گرنگ نییە ماڵ گەورە بێت و پڕ بێت لە کەل و پەلی گرانبەهاو ژووری زۆر، گرنگ ئەوەیە ڕووحی جێگاکە زیندوو بێت و کەسانی ناو ماڵەکە دڵگەرم بن، من پێموایە هەموو ماڵە کۆنەکان ئەو هەستە ئەبەخشن کە ئەچیتە ناوی هەست ئەکەی ئاشنایە بۆت و پێشتر لەوجێگایە بویت، دیوار و ژوورەکانیان ساڵ دوای ساڵ و یادگاری دوای یادگاری کۆ ئەکەنەوەو لەنێو بنمیچەکە ئەیشارنەوە و ئەیخەنە سەر ئەزموون و تەمەنی خانوەکە هەستی ئەوەی کە لە کۆنا ماڵێکی گەرم و گووڕ بوەو کەسەکانی ناوی شەوانە لەدەوری یەک کۆبونەتەوە گفتوگۆیان کردوەو دەیەها یادگاری و ڕووداوی جوانیان لێرە بەسەربردوە ، ئەو جێگایە وێنەیەکی پڕ ڕەنگ لە خەیاڵتدا دروستدەکات، وە هەر ئەمەشە کە هەمیشە ئێمە پەیوەست ئەکات بە جێگاکانەوە و لەیادەوەریماندا ئەیهێڵێتەوە