دوو شه‌ممه‌ , ئازار 4 2024

په‌رواز (9)

نه‌رمین ئه‌حمه‌د عبدالرحیم:
” كاتێ بڕیارى باڵاپۆشیمدا چاوه‌رێم نه‌كرد خه‌یات حیجابه‌كه‌م بۆبدروێت، خێرا حیجابی خاڵۆزاكه‌م له‌به‌ركرد”
ئا: هه‌لاله‌ محه‌مه‌د

پرۆفایل
نه‌رمین ئه‌حمه‌د عبدالرحیم
له‌دایكبووی 1963 له‌شاری هه‌ڵه‌بجه‌ى شه‌هید
خوێندنی سه‌ره‌تایی وناوه‌ندی له‌هه‌ڵه‌بجه‌ خوێندووه‌، پاشان خانه‌ی مامۆستایانى له‌شاری سلێمانی ته‌واوكردووه‌.
ساڵی (2006) كولێژی په‌روه‌رده‌ به‌شی ده‌رونناسى له‌شاری كركوك ته‌واو ده‌كات.
ئێستا توێژه‌ری ده‌روونیه‌ له‌قوتابخانه‌ى ساڵح قه‌فتانی بنه‌ڕه‌تی له‌شارى سلێمانى.


ئه‌وخوشكه‌ى كه‌سه‌یرى ڕوخسارى ده‌كه‌یت دڵسوزى وئه‌ویندارى بۆكاره‌كانى تیابه‌دى ده‌كه‌یت، خاتوونێكى بێده‌نگى پڕ كارى لێوان لێو له‌هه‌ستى به‌رپرسیارێتى‌و ئه‌وین‌و توانه‌وه‌، ئه‌وكچه‌ى كه‌هیچكات ئێش‌و ئازاره‌كانى رۆژگار مه‌وداى بۆدروستنه‌كردوه‌ له‌گه‌ڵ ئه‌و په‌یمانه‌ى كه‌به‌خواى خۆى داوه‌، هه‌نگ ئاسا هه‌میشه‌ سه‌رقاڵه‌‌و ده‌یه‌ویت بۆنى هه‌ڵاڵه‌ى به‌هار بۆئه‌وبێت بۆئه‌وه‌ى شیله‌ى ته‌واو ساغى دیندارى‌و محیبه‌ت بكاته‌دیارى بۆدۆست‌و هاوكاره‌كانى.
ئه‌م دارسێوه‌ به‌هۆى به‌رپرسیاریتى‌و سه‌نگینى پێگه‌ى‌و ئامانجه‌گه‌وره‌كه‌ى له‌ژیان، زۆرێك له‌شته‌كانى لاسووك بووه‌.
-ئاینده‌سازى: سه‌ره‌تاى باڵاپۆشی جه‌نابتان كه‌ى بوو؟ ئه‌و هۆكارانه‌ چی بوون واى لێكردن ببن به‌ باڵاپۆش؟

  • نه‌رمین ئه‌حمه‌د: سه‌ره‌تای باڵاپۆشیم ده‌گه‌ڕێته‌وه‌ بۆ به‌رواری(1/9/1984)، هه‌رله‌سه‌ره‌تای ساڵی هه‌شتاكانه‌وه‌ هه‌ستم به‌وگۆڕانكاری‌و هۆشیاریه‌ ئیسلامیه‌ ده‌كرد كه‌له‌شاری هه‌ڵه‌بجه‌ی شه‌هید ده‌كه‌وته‌ به‌رچاو كه‌زۆرێك له‌كچان ده‌بوون به‌باڵاپۆش به‌تایبه‌تی له‌ناوتوێژی قوتابیان ومامۆستایان وفه‌رمانبه‌راندا، كه‌ئه‌م حاڵه‌ته‌ تاڕاده‌یه‌ك شتێكی نوێ بوو به‌نسبه‌ت كوردستانه‌وه‌.
    هه‌رچه‌نده‌ له‌مێژه‌وه‌ ئافره‌تی كورد به‌جلو به‌رگه‌ كورییه‌كه‌یه‌وه‌ نمونه‌ی باڵاپۆشی بووه‌، به‌لام له‌قۆناغێكى نامۆدا بوه‌وه‌, ئه‌م حاڵه‌ته‌ جێگه‌ی سه‌رسوڕمانم بوو كه‌ئه‌وه‌نده‌ به‌عیشقه‌وه‌ پاپه‌ندده‌بوون به‌فه‌رمانی خوای گه‌وره‌وه‌، ئه‌مه‌ بووه‌ هۆی به‌دواداچونم له‌رێگه‌ی خوێندنه‌وه‌وه‌ به‌تایبه‌تی له‌بواری ته‌فسیری قورئانی پیرۆزو فه‌رمووده‌كانی پێغه‌مبه‌ر (درودی خوای له‌سه‌ربێت).
    كاتێك بڕیارمدا ببم به‌باڵاپۆش ئه‌وه‌نده‌ قه‌ناعه‌تم بۆدروست بوبوو ته‌حه‌مولم نه‌كرد بوه‌ستم تاخه‌یات حیجابه‌كه‌م بۆبدروێت، بۆیه‌ خێرا حجابی خاڵۆزاكه‌م له‌به‌ركرد، یه‌كه‌م ڕۆژی ده‌وامی قوتابخانه‌ كه‌مامۆستایان (مباشره‌) ده‌كه‌نه‌وه‌ به‌باڵاپۆشیه‌وه‌ ڕووم له‌قوتابخانه‌كرد, ئه‌و ڕۆژه‌ سه‌ره‌تای ژیانێكی نوێ بوو بۆمن.
    -ئاینده‌سازى: كاریگه‌ری كام كه‌سایه‌تى و كام كتێبت له‌سه‌ر بوو كه‌بویته‌ به‌باڵاپۆش؟
  • نه‌رمین ئه‌حمه‌د: دیاره‌ له‌ژیانمدا چه‌ندكه‌سایه‌تیه‌ك كاریگه‌ریان هه‌بووه‌له‌سه‌رم، هه‌ریه‌كێكیان له‌قۆناغێكی ژیانمدا، هه‌رله‌سه‌ره‌تاوه‌ برای خۆشه‌ویست‌و خوالێخۆشبووم كاك (ڕێبوارئه‌حمه‌د) كه‌به‌مامه‌ڵه‌ی جوان‌و هه‌ڵوێسته‌كانى سه‌رنجی سه‌رجه‌م ئه‌ندامانی خێزانه‌كه‌مانى ڕائه‌كێشا، نه‌ك به‌ئامۆژگاری كردن.
    هه‌روه‌ها مامۆستا (حه‌بیب محه‌مه‌د سه‌عید) ڕۆڵێكی زۆری هه‌بووه‌ له‌ژیانمدا وه‌كو مامۆستایه‌ك وانه‌م لاى ده‌خوێند، ئه‌وكاته‌ی كه‌بۆ یه‌كه‌مجار له‌شارۆچكه‌ی سیروان بووم به‌مامۆستا سوودی زۆرم لێوه‌رده‌گرت، به‌تایبه‌تی له‌نامیلكه‌ جوانه‌كانی، له‌كاتی پشووی هاویندا مانگی جارێك ده‌چوومه‌وه‌ له‌كتێبخانه‌كه‌ى ژماره‌یه‌ك كتێبم ده‌برد، پاش خوێندنه‌وه‌ی ده‌مانهێنایه‌وه‌و به‌شی خوێندنه‌وه‌ی مانگێكی ترمان ده‌برد، وه‌سه‌رپشكی كردبوین وزۆر به‌ئازادانه‌ ته‌سه‌روفمان به‌كتێبخانه‌كه‌یه‌وه‌ ده‌كرد.
    برای گه‌وره‌و به‌ڕێزم (مامۆستاحسه‌ین ده‌ڵه‌مه‌ڕی) ڕۆڵی گه‌وره‌و به‌رچاوی هه‌بووه‌ له‌ژیانمدا، ته‌فسیری قورئانی پێده‌وتینه‌وه‌، زۆر هانده‌رمان بوو بۆ له‌به‌ركردنی قورئانی پیرۆز, خوای گه‌وره‌هه‌وڵ و ماندبوونی ئه‌و مامۆستا به‌ڕێزانه‌ قبوڵبكات‌و بچێته‌ سه‌رمیزانی كرده‌وه‌ چاكه‌كانیان.
    سه‌باره‌ت به‌وكتێبانه‌ی كه‌كاریگه‌رییان هه‌بووه‌ له‌سه‌رم كتێبی ژیانی پێغه‌مبه‌ری مامۆستا شێخ عه‌زیز پاره‌زانی بوو كه‌ده‌ستم كرد به‌خوێندنه‌وه‌ی له‌ماوه‌ی دووڕۆژدا ته‌واوم كرد، هه‌روه‌ها كتێبه‌كانی مامۆستا حه‌سه‌ن پێنجوێنی‌و، زنجیره‌ نامیلكه‌كانی مامۆستا حبیب محه‌مه‌د سه‌عید بوون.
    -ئاینده‌سازى: تاچه‌ند كاریگه‌ریت له‌سه‌رماڵى خۆتان‌و ده‌وروبه‌رت هه‌بووه‌، یاكێ پاڵپشتت بووه‌ له‌كارى دعوه‌و سیاسه‌تدا؟
  • نه‌رمین ئه‌حمه‌د: دیاره‌خۆش نیه‌ مرۆڤ باسی خۆی بكات, سوپاس بۆخوا، به‌رده‌وام له‌هه‌رشوێنێكدا بووبم چ له‌ناوخێزانه‌كه‌مدا یاخود له‌شوێنی كاركردنم هه‌وڵمداوه‌ ئه‌ركی سه‌رشانم جێبه‌جێ بكه‌م‌و، ئه‌وكاره‌بكه‌م كه‌خوای گه‌وره‌پێی خۆشبێت، بۆ ئه‌ومه‌به‌سته‌ هه‌وڵبده‌م وتێبكۆشم كه‌بۆی هاتوینه‌ته‌ دنیاوه‌, كاتێكیش كارمكردووه‌ دووشت یارمه‌تیده‌رم بوون، یه‌كه‌م پاڵپشتی وهاوكاری خێزانه‌كه‌م، دووه‌م خودی خۆم كه‌هه‌رگیز هه‌ستم به‌ماندوێتی وبێزاری نه‌كردووه‌ چ له‌ڕووی ده‌روونیه‌وه‌ یاجه‌سته‌یی، به‌ڵكو چێژى ڕۆحی‌و ده‌روونیم لێ بینیوه‌. هه‌رچه‌نده‌ هه‌وڵدان بۆهێنانه‌دی هه‌رئامانجێك بێ كۆسپ‌و كێشه‌نابێت، به‌ڵام ئه‌وه‌ی گرنگه‌ بتوانین چوارچێوه‌یه‌ك بۆكێشه‌كان دابنێین‌و چاره‌سه‌ریان بكه‌ین، ئه‌وانه‌شی چاره‌سه‌رناكرێن بزانین چۆن مامه‌ڵه‌یان له‌گه‌ڵ بكه‌ین .
    -ئاینده‌سازى: له‌كاتى خوێندن‌و خوێندكاریتدا له‌لایه‌ن ڕژێمه‌وه‌ هیچ كۆسپێكت بۆ دروستكراوه‌، یان فشارت له‌سه‌ر بووه‌؟ فه‌سڵكرایت له‌سه‌ر باڵاپۆشیت؟
  • نه‌رمین ئه‌حمه‌د: له‌قۆناغه‌كانی خوێندنمدا باڵاپۆش نه‌بووم تابه‌هۆی باڵاپۆشیوه‌ كۆسپێكم بۆدروست بووبێت، به‌ڵام وه‌كو كوردێك بێبه‌ش نه‌بووین له‌فشاره‌كانی ڕژێمی پێشوو، به‌تایبه‌تی له‌قۆناغی خوێندم له‌خانه‌ی مامۆستایان كه‌ئه‌وكاته‌ زۆریان لێده‌كردین (جه‌یش شه‌عبی) بین، ڕۆژانه‌ ژماره‌یه‌ك له‌ره‌فیق حزبیه‌كان ده‌هاتن ته‌مرینیان به‌خوێندكاره‌ كچه‌كان ده‌كردو ڕۆژانه‌ دووسێ وانه‌ی بۆته‌رخان ده‌كرا، ئێمه‌ش ئه‌م حاڵه‌ته‌مان قبوڵ نه‌ده‌كردو هه‌رله‌وانه‌ی چواره‌مه‌وه‌خۆمان ئه‌دزیه‌وه‌و به‌كۆڵانه‌كاندا ڕامانده‌كرد تادوور ده‌كه‌وتینه‌وه‌ كه‌به‌یانی ده‌هاتینه‌وه‌ بۆده‌وام ئه‌كه‌وتینه‌ به‌رهه‌ڕه‌شه‌و ترساندن وده‌ركردنی بڕیاری فه‌سڵكردن, هه‌رچه‌نده‌ جێبه‌جێش نه‌ده‌كرا، به‌ڵام جاری واهه‌بووه‌ چه‌ند مانگێك له‌ژێرفشارێكی ده‌روونی قورس ده‌بووین.
    -ئایندسازى: یه‌كه‌مین په‌یوه‌ندی كاری سیاسی وده‌عه‌وى جه‌نابتان كه‌ى بوو؟
  • نه‌رمین ئه‌حمه‌د: هه‌رله‌سه‌ره‌تای هه‌شتاكانی سه‌ده‌ی پێشووه‌وه‌ ئیلتزامم هه‌بووه‌ به‌كاری بانگه‌وازو وانه‌خوێندنه‌وه‌, به‌نسبه‌ت كاری سیاسیشه‌وه‌ هه‌رله‌سه‌ره‌تای ڕاگه‌یاندنی یه‌كگرتووی ئیسلامی كوردستان له‌ساڵی (1994)، ئه‌ندامى ئه‌وحزبه‌م‌و به‌شانازیه‌وه‌ بۆیه‌ك ڕۆژ دانه‌بڕاوم.
    -ئاینده‌سازى: یاده‌وه‌ریه‌كی ژیانت له‌یادت نه‌چێت؟
  • نه‌رمین ئه‌حمه‌د: دیاره‌له‌ژیانی هه‌رتاكێكدا یاده‌وه‌ری خۆش وناخۆش بوونی هه‌یه‌ وهه‌ندێكیان له‌بیرناچنه‌وه‌، یه‌كێك له‌ویاده‌وه‌ریانه‌ ئه‌وه‌بوو یه‌كێك له‌وڕۆژانه‌ی كه‌تۆپبارانی شاری هه‌ڵه‌بجه‌ ده‌كرا له‌كاتی شه‌ڕی نێوان عێراق وئێراندا، هه‌موومان چوبوینه‌ ژێرخانی ماڵی دراوسێیه‌كمان، به‌ڵام له‌پڕهاته‌وه‌ یادم كه‌ئێستا مه‌وعدی وانه‌ی قورئان خوێندنه‌كه‌مه‌و هه‌رئێستا ده‌بێت بگه‌مه‌ ماڵی كاك حاجی حه‌سه‌ن برای مامۆستا حسه‌ین كه‌به‌ڕێزیان له‌ماڵی ئه‌وان وانه‌كه‌ی پێ ده‌وتین وماڵی به‌ڕێزیان له‌گه‌ڕه‌كی مامۆستایان بوون دووربوون له‌وشوێنه‌ی كه‌وانه‌كه‌مان لێ ده‌خوێندوه‌، هه‌موو هه‌فته‌یه‌ك مامۆستا ئه‌وئه‌ركه‌ی ده‌كێشاو ده‌هاته‌ماڵی كاك حاجی برای بۆئه‌وه‌ی ڕێگه‌كه‌ بۆقوتابیه‌كان نزیك بێته‌وه‌, وه‌له‌وكاته‌ی ویستم بێمه‌ده‌ره‌وه‌و بڕۆم هه‌مووسه‌ریان سووڕماو ده‌یانوت ئێستا كه‌ی وه‌ختی قورئان خوێندنه‌! به‌م تۆپبارانه‌ مامۆستا حسه‌ین چۆن له‌وشوێنه‌ دووره‌وه‌ دێت بۆوتنه‌وه‌ی وانه‌كه‌ی، به‌ڵام من هه‌ستێكم بۆدروست بووبوو دڵنیابووم كه‌به‌ڕێزیان ئاماده‌ ده‌بن, كاتێك گه‌یشتم سه‌یرمكرد مامۆستا له‌وێ ئاماده‌یه‌و به‌ته‌نهادانیشتووه‌، چونكه‌ جگه‌ له‌من هیچ قوتابیه‌كی تر نه‌هاتبوو، هه‌رچه‌نده‌ ئه‌وڕۆژه‌ ڕۆژێكی زۆر نائاسایی بوو، به‌ڵام بۆمن زۆرگرنگ بووكه‌ به‌عه‌مه‌لی فێری به‌رپرسیاریه‌تی كردم كه‌ئامانج له‌ئاماده‌بوونی مامۆستا له‌وساته‌ مه‌ترسیداره‌دا ته‌نها بۆئه‌وه‌بوو نه‌وه‌ك ته‌نها قوتابیه‌كیشی ئاماده‌بێت، به‌ڵام خۆی ئاماده‌نه‌بێت, دیاره‌ ئه‌وڕۆژه‌ ئه‌ركێكی ترم بۆمامۆستا زیادكرد چونكه‌ دڵیان نه‌هات كه‌خۆم به‌ته‌نها بگه‌ڕێمه‌وه‌ بۆماڵه‌وه‌ به‌ڕێزیان هاتنه‌وه‌له‌گه‌ڵمدا, داواكارم له‌خوای گه‌وره‌ نموونه‌ی زیادبكات.
    -ئاینده‌سازى: كاره‌كانت له‌ناو یه‌كگرتوو ویه‌كگرتووى خوشكان وكارى ده‌عه‌ویدا چین؟
  • نه‌رمین ئه‌حمه‌د: هه‌رله‌سه‌ره‌تای كاركردنمه‌وه‌ وه‌كوكادرێك كاری ناوڕێكخستنم كردووه‌ له‌كه‌رت‌و ناوچه‌و كارگێڕی لق وپاشان ماوه‌ی پێنج ساڵ به‌رپرسی لقی یه‌كگرتووی خوشكان بووم وئێستاش ئه‌ندامی مه‌كته‌بی كاروبارى خوشكانم .
    -ئاینده‌سازى: ڕێنمایت بۆ كچان چیه‌ وه‌ك تویژه‌رێك ئه‌مرۆ كه‌زورترین كێشه‌كان ڕوبه‌رى ئه‌وان ده‌بێته‌وه‌؟
  • نه‌رمین ئه‌حمه‌د: دیاره‌قۆناغی هه‌رزه‌كاری هه‌ستیارترین قۆناغی ته‌مه‌نی مرۆڤه‌, له‌هه‌مانكاتدا كاریگه‌ریه‌كی زۆری هه‌یه‌ له‌سه‌ر ئه‌وگۆڕانكاریانه‌ی كه‌له‌كۆمه‌ڵگه‌دا رووده‌دات ئه‌گه‌ر ئیجابی بێت یاخود سلبی وهیوادارم كچان ولاوانی ئێمه‌ هه‌میشه‌ ڕۆڵی ئیجابی ببینن هه‌ست به‌و به‌رپرسیاریه‌تیه‌ بكه‌ن كه‌له‌سه‌رشانیانه‌ ئه‌مه‌ش به‌متمانه‌ به‌خۆبوون وپابه‌ندبوون به‌به‌هاڵاكان وگه‌ڕان به‌دوای زانست وكات به‌فیڕۆنه‌دان ئه‌نجامئه‌درێت .
    -ئاینده‌سازى: كه‌س وكارتان له‌كاره‌ساتى كیمیابارانى هه‌ڵه‌بجه‌ وشه‌هیدتان چه‌ند بووه‌؟
  • نه‌رمین ئه‌حمه‌د: سه‌باره‌ت به‌كاره‌ساتی كییمیابارانی شاری هه‌ڵه‌بجه‌ دیاره‌ ژماره‌یه‌كی زۆر له‌ئازیزان وخزمان ودۆستان وهاوڕێی خۆشه‌ویستمان له‌ده‌ستدا، به‌تایبه‌تی هاوڕێی خۆشه‌ویستم خوشكه‌ ڕۆژگار سالح هه‌ژار.
    به‌نسبه‌ت خێزانه‌كه‌مه‌وه‌ یه‌كه‌م بۆردومانی شاری هه‌ڵه‌بجه‌ ماڵی باپیرم بوونه‌ ئامانج سێ پوورو خاڵێكم شه‌هیدبوون كه‌پوورێكم به‌برینداری چووته‌ وڵاتی ئێران تائێستاش هه‌واڵی نازانین نه‌به‌ مردووی ونه‌به‌زیندوێتی، ماڵی پوره‌ گه‌وره‌كه‌م كه‌له‌گه‌ڕه‌كی توه‌وشك بوون‌و ئه‌و گه‌ڕه‌كانه‌ زۆربه‌خه‌ستی به‌ركیمیایى كه‌وتن و پاش ده‌ساڵ له‌كێبركێیه‌كی قورس له‌گه‌ڵ ئاسه‌واری كیمیاویه‌كه‌ له‌سه‌ر جه‌سته‌ی وه‌فاتی كرد، خوای گه‌وره‌ به‌به‌هه‌شتی به‌رین شادیان بكات وڕۆحیان ئاسووده‌بێت.

Check Also

ژیانی حیصه‌
(له‌واقعی ژیانه‌وه‌)

 وه‌رگێرانی: كه‌تان خادیمی حیصه‌ ته‌مه‌نی شانزه‌ ساڵ بوو، له‌ یه‌كێك له‌ لادێكاندا ئه‌ژیا، دایكی كۆچی دوایی …

وەڵامێک بنووسە

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *