خەرامان محەمەد
ڕۆژەکان بە خێرایی تێدەپەڕن، وا بەرەو کۆتا رۆژەکانی ڕەمەزان دەڕۆین، ئەو کاتەی ژاوەژاوی سەرەتاکان نامێنێت و عیبادەت لەناو ڕۆحماندا وەک عادەتێکی شیرین نیشتەجێ دەبێت. لەم ڕۆژەدا، ئێمە تەنها بەدوای تێپەڕبوونی کاتژمێرەکاندا ناگەڕێین، بەڵکو بەدوای “قبوڵبوون”دا دەگەڕێین. ئەمڕۆ ڕۆژی موناجاتە بێدەنگەکانە، ئەو کاتەیە دەنگەکان کپ دەبن و دەنگی دڵ بەرز دەبێتەوە.
لەکۆتا ڕۆژەکانی ئەم مانگە پیرۆزەدا، تێدەگەین کە ڕێگەی گەیشتن بە خودا تەنها بە زۆریی کارەکان نییە، بەڵکو بە ڕاستگۆیی دڵەکانە. چەندین کاری بچووک هەبوون کە (نییەت) گەورەیکردن، چەندین ساتەوەختی خەڵوەت و تەنیایی لەگەڵ خودا هەبوون کە ئاڕاستەی دڵیان بە تەواوی گۆڕی.
ئەم ڕۆژانەی ماون بە دڵێکی بێدارەوە بقۆزینەوە؛ پێداچوونەوە بە خۆماندا بکەین، نزاکانمان زیندوو بکەینەوە و نێوان خۆمان و خودا چاک بکەین.
سا خودایە.. هەروەک چۆن گەیاندتینە ئەم ڕۆژانەی ڕەمەزان، ئاواش بە قبوڵبوون و لێخۆشبوون بۆمان تەواو بکەیت.
وامان لێبکە ئەوەی ماوە لەوەی ڕۆیشتووە باشتر بێت، پشکێکی ڕەحمەت و ڕزگاربوون لە ئاگری دۆزەخمان بۆ بنووسیت، و بمانگەیەنیتە شەوی قەدر لە کاتێکدا لە باشترین حاڵدا بین.
خودایە.. ئێمە نازانین کام کارەمانت قبوڵ کردووە، بەڵام دەزانین تۆ لەوە میهرەبان تری کە بە دەستی بەتاڵ و نائومێدی بمانگەڕێنیتەوە.
پەروەردگار لەم ڕۆژەدا بەشمان بدە لە نورێک کە تاریکی سینەمان ڕووناک بکاتەوە، سەباتێکمان پێ ببەخشە کە بمانگەیەنێتە شەوی قەدر بەوپەڕی ئیمانەوە.
