هەڵاڵە محەمەد ئەڵماس
لە شەوانی قەدر زۆرجار مزگەوتەکان پڕ دەبن، دەستەکان بەرز دەبن بۆ دعا و چاوەکان فرمێسک دەڕێژن. بەڵام پرسیارێکی گەورە هەمیشە دەبێت لە ناخماندا بێت:
ئایا خودا تەنها چاوەڕێی سوجدەکانمانە؟ یان چاوەڕێی ئەوەیە کە دڵ و مامەڵەکانمان بگۆڕین؟
چەندین جار دەبینین کەسێک شەو تا بەیانی لە مزگەوت دەمێنێتەوە، بەڵام کە دەڕواتەوە ماڵەوە مامەڵەی توندە بەرامبەر بە هاوسەر و منداڵەکانی. کەسێک قورئان دەخوێنێت، بەڵام زمانی توندە بەرامبەر بە خێزانەکەی. جا ئەگەر عیبادەتەکانمان نەبنە هۆی نەرمبوونی دڵ و چاکبوونی مامەڵەکردنمان، ئەوە شەوانی قەدرمان هێشتا شۆڕشی ئەخلاقی تێدا دروست نەکردووین.
شەوی قەدر دەبێت ببێتە شەوی نوێنووسینەوەی پەیمان:
باوکان پەیمان بدەن بەخودا کە زوڵم و توندوتیژی لە ماڵدا نەهێڵن.
دایک پەیمان بدات کە میهرەبانی و ئارامی لە ماڵدا بڵاو بکاتەوە.
کوڕ و کچ پەیمان بدەن کە ڕێزی دایک و باوک بگرن.
هاوسەران پەیمان بدەن کە دادپەروەری و ڕێزگرتن ببێتە هەوێنی ژیانیان.
شەوی قەدر تەنها ئەوە نییە کە هەتا بەیانی لە مزگەوت بمێنینەوە، یان بەردەوام زیکرو قورئان بخوێنین؛ بەڵکو ئەوەیە کە دڵەکانمان بشۆینەوە بە ئاوی ئەخلاق و لەو شەوەوە ژیانێکی نوێ دەست پێبکات.
با ئەم شەوانە بکەینە قوتابخانەی ئەخلاق:
شەوی لێبوردن، شەوی دادپەروەری، شەوی ڕاگرتنی زوڵم لە نەفسی خۆمان و لە خێزانەکانمان.
ئەگەر شەوی قەدر بتوانێت دڵێک بگۆڕێت، خێزانێک دڵخۆش دەبێت، زوڵمێک لە ماڵێک نەمێنێ، ئەوە بە ڕاستی شۆڕشی ئەخلاقی ئەم شەوانەیە.
کەواتە قەدر هەل و فرسەتی تەمەنە بۆ خۆ دروستکردن و خۆ دۆزینەوەو بونیاتنان، کە سەرچاوەی هەر هەموویشی لە ناسینی خودا بەرهەم دێت کە دەبێ لە قەدردا زیاتر خوا بناسین لە عابدەوە ببین بەعالم و بەقدر و ڕوناکبوونی تەمەن جەژنی سەرکەوتن و الله اکبری قەبوڵ بوون تۆمار بکەین، بە پشتیوانی خودا.
