نوسینی: بەهار عبدالرحمن محمد
مانگی ڕەمەزان مانگی ڕەحمەت و لێبوردن و عیبادەتە و دەرفەتێکە بۆ پتەوکردنی پەیوەندی خێزانی و ڕێکخستنی ژیان و بەکارهێنانی کات لە خێر و پەرستشەکاندا، بۆ ئەوەی پێشوازییەکی گونجاو بکرێت پێویستە لە ڕووی ڕۆحی و دەروونی و دارایی و کۆمەڵایەتییەوە ئامادەکاری بۆ بکرێت بەم شێوازە:-
یەکەم: ئامادەکاری ڕۆحی
ئامادەکاری ڕۆحی بە یەکێک لە گرنگترین کارەکان دادەنرێت کە خێزانەکان لە ڕەمەزاندا ئەنجامی بدەن، بۆ ئەوەی مانگەکە پڕ بێت لە خێرو عیبادەت بە:
١-پتەوکردنی پەیوەندی لەگەڵ خودا لەڕێی:
-قورئان خوێندنی ڕۆژانە تەنانەت ئەگەر چەند ئایەتێکیش بێت، بۆ ئەوەی ڕەمەزان دەرفەتێک بێت بۆ خەتمکردنی قورئان.
-داوای لێبوردن و دوعاکردن کە خودا یارمەتی بدات بۆ بەڕۆژووبوون و نوێژکردن و بەردەوامی نیعمەتەکانی.
٢-ڕاهێنان لەسەر ئەنجامدانی پەرستشەکان لەڕێی:
-ڕاهێنانی منداڵان بە ڕۆژووگرتنی وردە وردە و فێرکردنی بەهاکانی ڕەمەزان بە شێوەیەکی ئاسان وەک ڕێگەخۆشکردن بۆ ئەنجامدانی ئەم پەرستشسە مەزنە.
-ڕاهێنانی ئەندامانی خێزان لەسەر ئەنجامدانی نوێژی بەیانی و نوێژەکان بە جەماعەت، بۆ ئەوەی لە ڕەمەزان و دواتریشدا ببێتە خوو.
٣-داڕشتنی پلانی پەرستشەکان لەڕێی:
-دیاریکردنی کاتەکانی زیکر و دوعاکان و قورئان خوێندن.
- تەرخانکردنی کاتێکی دیاریکراو بۆ ئامادەبوون لە وانە ئاینییەکان و ئامۆژگارییە ئاینیی و خێزانییەکان، جا چ لە مزگەوت بێت یان بە شێوەی ئۆنلاین یان لە کەناڵەکانی ڕاگەیاندن.
دووەم: ئامادەکاری دەروونی و خێزانی
١-دروستکردنی کەشی ڕەمەزان لە ماڵەوە لەڕێی:
-هەڵواسینی دیکۆراتی ڕەمەزان، وەکو فانووس و هیلال، بۆ بەرزکردنەوەی هەستی هاتنی مانگی پیرۆزو پڕ خێر.
-گۆشەیەک بۆ نوێژ و قورئان خوێندن تەرخان بکە، کە بۆ منداڵان و گەورەکان گونجاوە.
-گوێ بیستی موناجاتی ڕەمەزان و پاڕانەوە بۆ دروستکردنی کەشێکی ئارامی ئیمانی.
٢-ڕێککەوتن لەسەر داب و نەریتی ڕەمەزانی خێزانی وەک: - تەرخانکردنی کاتێکی دیاریکراو بۆ ئەوەی خێزانەکە شەوانە کۆببنەوە بۆ گفتوگۆکردن لەسەر بابەتێکی ئایینی یان خوێندنی قورئان.
-کەمکردنەوەی بەکارهێنانی مۆبایل و تەلەفزیۆن، ڕێککەوتن لەسەر بەرنامە بەسوودەکان بۆ ئەوەی لە ماوەی مانگەکەدا پەیڕەوی لێبکەن.
-دانانی تەحەددیاتی ڕەمەزان لەناو خێزاندا، وەک ئەوەی کێ یەکەمجار قورئان تەواو دەکات، و کێ پابەندە بە زیکرو نوێژە سوننەتەکان، ئەمەش هانی هەمووان دەدات سوود لە ڕەمەزان وەربگرن.
٣-فێرکاری منداڵان دەربارەی ڕەمەزان لەڕێی:
-خوێندنەوەی چیرۆکی ڕەمەزان بۆ منداڵان بۆ ئەوەی هۆشیارییان لە گرنگی ڕۆژوو و نوێژ و چاکەکاری زیاتر بێت.
-هاندانی بەڕۆژووبوونی وردە وردە، وەک بەڕۆژووبوون بۆ ماوەی نیو ڕۆژ یان بەڕۆژووبوون تا نیوەڕۆ و پاشان پاش نیوەڕۆ.
-دابینکردنی پاداشتی هاندان بۆ بەڕۆژووبوون و قورئان خوێندن، بۆ ئەوەی هەست بە دڵخۆشی وسەرکەوتن بکەن.
–هاندانی منداڵان بۆ بەشداریکردن لە کارە خێرخوازییەکان، وەک دابەشکردنی خورما و شیرینی و ئاو لە مزگەوتەکاندا.
سێیەم: ئامادەکاری و ڕێکخستنی دارایی
١-پلاندانان بۆ ژەمەکانی ڕەمەزان
-ئامادەکردنی خشتەی هەفتانە بۆ خواردنەکان بەمەبەستی ڕێکخستن و گەڕانەوەی کات لە کەمکردنەوەی کێشەی سەرقاڵی بە چێشت لێنان لە ڕۆژدا.
-گرنگیدان بە ژەمە تەندروست و هاوسەنگەکان بۆ دەستەبەرکردنی وزەی پێویست و تەندروستییەکی باش.
٢-ڕێکخستنی بودجە و خەرجییەکان
-کەمکردنەوەی خەرجییەکان لە بابەتی کەمالیات بە مەبەستی تەرخانکردنی بۆ خێر و بەخشینەکان و زەکاتی فیتر.
-کڕینی پێداویستیەکانی ڕەمەزان لە کاتی خۆیدا پێش دروستبوونی قەرەباڵغی و گرانی نرخ.
-تەرخانکردنی بودجەیەکی دیاریکراو بۆ بەخشین و ئەنجامدانی ئیفطاری بە کۆمەڵ.
-دوورکەوتنەوە لە سەرقاڵی زۆر و ڕێکخستنی ماڵ لەسەر حیسابی زیکرو پەرستشەکان.
چوارەم: ئامادەکاری کۆمەڵایەتی
١-بەهێزکردنی پەیوەندی خێزانی و سیلەی ڕەحم.
-ڕێکخستنی سەردانی خێزانی و پەیوەندی تەلەفۆنی بۆ پتەوکردنی پەیوەندی کۆمەڵایەتی.
-ئەنجامدانی ئیفطار لەگەڵ خزم یان هاوڕێیان بۆ زیادکردنی خۆشەویستی.
-ئامادەکردنی دیاری سادەی ڕەمەزان بۆ خێزان و دراوسێ، وەک خورما، گوێز، ناوساجی…
٢-پلاندانان بۆ کارە خێرخوازیەکان
-بەپێیی توانا ئامادەکردنی سەبەتەی ڕەمەزان کە خۆراکی سەرەکی تێدایە و دابەشکردنی بەسەر ئەو کەسانەی کە پێویستیان پێیەتی.
-بەخشینی پارە یان خواردن بۆ مزگەوتەکان و کارە خێرخوازییەکان.
٣-بەڕێوەبردنی کات بە ژیرانە
-کەمکردنەوەی چالاکییە ناپێویستەکان و گرنگیدان بە عیبادەت و کردەوەی چاکە.
-دابەشکردنی ئەرکەکان لە نێوان ئەندامانی خێزان بۆ ئەوەی تەواوی بارگرانییەکە نەکەوێتە سەر کابانی ماڵ بە تەنها.
-تەرخانکردنی کات بۆ پشوودان و خەوێکی گونجاو بۆ ئەوەی ماندوێتی کاریگەری نەبێت لەسەر ئەنجامدانی عیبادەتەکان.
لە کۆتاییدا دەخوازێت هەمووان بە ڕۆحێکی نوێ بەخێرهاتنی ئەم مانگە پیرۆزە بکەین، چونکە ڕەمەزان دەرفەتێکی زێڕینە بۆ گۆڕینی خووی خراپ و بەرەوپێشبردنی خووی ئەرێنی، ئەگەر خێزانەکان بەباشی ئامادەکاری بۆ بکەن، ئەوا هەست بە ڕۆحانییەتی مانگەکە دەکەن و زۆرترین سوودی لێ وەردەگرن، ئەم مانگە بکەین بە سەرەتایەکی نوێ بۆ گوێڕایەڵی و نزیکبوونەوە لە خودا و گەیشتن بە تەبایی خێزان.
