مردن ون بوون نیە

و:بینایی صبار
مردن، کە کۆتایی ژیانی کاتییە، نە بڕانەوەیە نە هیچبوونە نە ونبوونە، نە قڕبوونە و نە نەمانە- نە جیابوونەوەی هەتاهەتایی و نە هەڵکەوتە و نە دیارنەمانە- نەخێر، ئازادکردنێکە کە لەلایەن بوونێکی زانا و بەبەزەییەوە بۆمان دێت، وە گۆڕینی شوێنمانە، بردنمانە بەرەو نیشتیمانی ڕەسەنمان، وە درگای گەیشتن بە جیهانی بەرزەخە کە
شوێنی کۆبونەوەی سەدان خۆشەویستی ئێمەیە.

بۆیە، نابێ دڵتەنگ بین بە بیرکردنەوە لە ژیانی کاتی. پێویست ناکات پەشیمانی دەرببڕین و هەناسەسارد بین دەربارەی هاتنە ئەم جیهانەوە.
لەلایەن پەروەردگارەوە نێردراوینەتە ئەم جیهانە تا شوکرانەبژێری دەرببڕین لەبەرامبەر نێعمەتە بێشومارەکانی بۆمان. لەبیرکردنی پەروەردگارمان و نەناسینی- یان خراپتر، یاخیبوون دژی ئەو دەبێتە هۆی شکستی مەزنی مرۆڤایەتی. پرسەکەمان پرسی بردنەوە یان دۆڕانی دڵخۆشی هەتاهەتایییە لە ڕۆژی دواییدا. بە واتایەکی تر، دۆزێک کراوەتەوە کە پەیوەندی بە هەموو مرۆڤێکەوە هەیە و ئەنجامەکەی بریتییە بەندە لەسەر باوەڕهێنانیان، کە بەدەستهێنان یاخود لەدەستدانی خاکی هەمیشەیی نەبڕاوەیە، کە بە باخچە و کۆشک ڕازێنراوەتەوە.
بە جۆرێک کە “هەزاران ساڵ لە دڵخۆشی ئەم دنیایە نە یەکسانە نە هاوشێوەی یەک کاتژمێری بەهەشت نییە.”

ئێستاش پرسیارە سەرەکییەکەمان، چۆن دەتوانین دڵخۆشی ژیانی دواترمان دەستەبەر بکەین؟
ئێمە دەبرێین و دەڕۆین بەرەو جیهانێکی هەتاهەتایی. هەر لە یەکەم مرۆڤەوە بەردەوام لەلایەن پەیامبەرانی خوداوە گەیەنراوە کە ئەم جیهانە نیشتیمانی ڕاستەقینەمان نییە. وەکو میوانخانەیە کە دواتر دەگوازێینەوە بۆ نیشتیمانی بنەڕەتیمان.
ئەو کەسانەی باوەڕیان بە ڕۆژی دوایی هەیە، لەم جیهانەدا بە شێوەیەک دەژین کە ئەنجامەکانی دوای مردنیان ڕەچاو بکەن. ئەوانەی باوەڕیان نییە و نایانەوێ دوای مردن لەیەک بدەنەوە، ژیانێک دەژین دوور لە دڵخۆشی ڕاستەقینە.
هەڵگرتنی ئەرکی بەندایەتی بە باشترین شێوە، کە لە ئەنجامی ئیمانەوەیە، زۆر بەنرخە و زۆریش بەسوود. ئەنجامدانی ئەو شتانەی بیروباوەڕ داوای دەکات خەڵکی دڵخۆش دەکات و چێژ بە ژیانیان دەدات.

ئەمانە چەند هەنگاوێکن کە دڵخۆشی هەتاهەتایی دەستەبەر دەکەن:

یەکەم: دەبێت پەروەردگار بناسین و باوەڕی پێ بکەین. ئەم جیهانە شوێنی یادکردنەوەی بەبەزەییترینە و مەیدانی تاقیکردنەوەی جیهانیانە. پەیوەندی ڕۆحی بەهێز لەگەڵ خالق ئەوە لە دڵمان دەگەیەنێت کە دڵخۆشیەکانی دنیا تەنها هەڵهاتنە لە کێشەکانمان و پەنابردنە بەر چێژبەخشێکی کاتی. هەوڵدانیش بۆ دڵخۆشکردنی خودا دەمانگەیەنێت بە خۆشبەختی دوای ژیانی دونیاش.

دووەم: پێویستە ملکەچی یاسایی خودایی بین و لەسەری بمێنینەوە لەبری حەزی خودویستانەمان. هیچ کەس لەسەر ئەو ڕێگای پەرستشە ون نابێت، ئەوانەی لەسەری دەڕۆن سوکنایی و حەوانەیان بۆ دەبێت چون دڵگرانی لەدەستدانەکانی یەک و دوو ڕۆژی ئێرە نابن.
لەسەر ئەم ڕێیە، پێویستە هەندێک بەرپرسیارێتی لەسەر شانمان هەڵبگرین، کە بەشی خۆیان قورسن، کەچی دڵ و ڕۆحمان لە قورسایی هەزاران گومان و ترس ڕزگاری دەبێت. بەڵام ڕێگەیەکی تریش هەیە بیگرینە بەر؛ ڕێگای ئارەزووە خۆویستەکانمان. کە لەسەر ڕێ دەکەین، بە ڕوواڵەت هەست بە سووکی دەکەین، هەست بە سوکناییەکی خەڵەتێنەر کە ئەنجامەکەی هەر شکست و لەدەستدانە.

سێیەم؛ پێویستە پێنج نوێژەکەی ڕۆژانە ئەنجام بدەین. ژیان بێ نوێژکردن نییە. نوێژ گرنگترین پەرستشە، بەجێهێنانیشی زۆر ئاسانە. لە ٢٤ کاتژمێری ڕۆژەکەمان کەمتر لە یەک کاتژمێر پێویستە بۆ ئەنجامدانی نوێژەکان ئەگەر سوننەتەکانیش بکەین. ئەگەر ٢٣ کاتژمێر لە ژیانی ئێستامان بەسەرببەین کە زۆر کورت و کاتییە، بەڵام تەنها یەک کاتژمێر بۆ ژیانی دوای مردنمان دانەنەنێین کە هەتاهەتاییە، دڵمان ڕەش و ڕەق دەبێت و سەرگەردانین. ئاسوودەیی مەزنی ڕۆح، دڵ و مێشک لە نوێژدایە.

چوارەم؛ دەبێت خۆمان لە گوناهە دنیاییەکان لابدەین. هەڵەیە کە ئارەزووی نەفسی نزممان بخەینە پێش ئەرکی بەندایەتی. پێویستە بەردەوام دژی نەفسی خۆمان و شەیتان بجەنگین تا بەتەواوی واز لە گوناهە دنیاییەکان بهێنین و پەیوەستی هیچ هەستێکی کاتی نەبین. بێعەیبی تەنها بۆ خودایە و ئەویش چاوەڕێ لە مرۆڤایەتی ناکات کە بێگوناهـ بن، تەنها ئەوپەڕی هەوڵی خۆمان بدەین کە نەکەوینە ژێر ڕکێفی چەپەڵی دوژمنی ناکۆتامان کە شەیتانە. ببینە ئەو بەندەیەی خودا بە دڵسۆز ناوی هێناوین.