ئایندەی من

‎خەرمان عبدالكریم

‎هەموومان چەترێك ئەخەینە بەر تنۆكی باران تا تەڕنەبین، من وەك پەروەردەكارێك چی بخەمە خزمەتی ئەم خوێندكارانەم تا بەسەر ئاستەنگەكانی ژیان سەربكەون، ئەگەر من خۆم بپاریزم لە بارانیك ئەی ئەوان چۆن فێر ببن خۆیان لەلاوازی و سەرنەكەوتن دوربخەنەوە.

 پزیشك بۆ ئەوەی دەرمانێك بنوسێت پێویست دەكات نەخۆش خۆی ببینێت، ئێمەی مامۆستا برینی خوێندكارەكانمان لەسەر ڕوویان بوونی هەیە، لەچاویاندا ئەدرەوشێتەوە بە دەنگی لەرزۆكی هاوارێكی هێمن ئەكات، بەڵام لەم سەنگ و قورساییە ئاسان تێ ناگەین، ئاسان نابینین، یان نامانەوێت بیبینین!!!

 ‎بۆ ئەوەی تێ بگەیت یان ئەبیت ببیتە باران، بەخوڕ دابكەیت تا بیكەیتە ناو زەوی و بیشكێنیتەوە، یان ئەبیت ببیتە چەترێك وەك باوەشێكی پڕ لە میهر زانستی پێ ببەخشیت ‎ئەگەرچی ئەوان ئایندەیەكی ناڕوون مەزەندە دەكەن، كاتێك هەزاران ئومێدیان لەژینگە كۆمەڵایەتیەكەیان لەناوبراوە پرسی ئایندەی من چییەو بۆ كوێ و لەكوێیە، كۆتا شتە هزریانی پێ بخەنە ناو بازنەی بونیانەوە.

 ئەوان فێرنەكراون ڕۆشنفكری لەكوێوە مامەڵەی لەگەڵ دەكرێت، دەبێت ئەم زەمینەسازییە من و تۆی پەروەردەكار خۆشەویستی و تۆوی چەندین ساڵەی لەباربراو چەكەرەی پێ بكەینەوە پێیان بڵێین پەرتوكەكان ئەگەر هەڵەو سەنگیان زۆرە، پڕن لە مەعریفەی نوێگەری بۆتان، پڕە لەو بەهرانەی كە دركیان پێ ناكەن، ئێمە ئەبێت هەم مەعریفەناسیان پێ ئاشنا بكەین، هەمیش دەرخەری لایەنە شاراوەكانی ژینیان بین، بەهرەكانیان گەشە پێبدەین، دوربكەوینەوە لەشكاندنەوەیان لە برینداركردنی هەستەكانیان، ڕێگە بدەین ئەوەی لەسەردەمی ئێمەدا عەسكەرتاریەت بوو ئەمرۆ ڕێگەی گفتوگۆ كراوەكان لەچوارچێوەی ڕێزدا بەگرنگەوە لێی بڕوانین و مافی بەرپرسیارێتی و خۆشبینی بخەینە خزمەتی نەوەی نوى