منداڵان لەتەمەنی پێش قوتابخانە چیان فێربکرێت

ئاسیە مەجید

ماستەر لە پەروەردەو فێرکرنی زمانی ئینگلیزی

مامۆستا لە زانکۆی سلێمانی

تەمەنی پێش قوتابخانە قۆناغێکی لەبارە بۆ ئامادەسازکردنی منداڵان بۆ خۆشویستنی پرۆسەی فێربوون و خۆشی لێ وەرگرتنی. هەندێک لە دایبابان پێیان وایە دەبێت ئەم تەمەنە واز لێبهێنرێت بۆ یاری و گەمە، هەندێکیش پێیان وایە دەبێت وەک فرسەتێک لێی بڕوانرێت و سوودی فێرکاری و پەروەردەیی لێ وەربگیرێت.

ئەوەی من لەم چەند خاڵەدا دەیخەمە ڕوو چەند ڕێنماییەکی جێ بەجێ کاریە بۆ جۆری دووەمی دایبابان لە ئامادەسازکردنی منداڵەکانیان بۆ فێربوونی پیتەکانی زمانی دایک لە قۆناغی پێش قوتابخانەدا.

1)دایکی ئازیز، یەک دەستە ماجیکی ڕەنگاو ڕەنگ بکڕە ودەستەیەک قەڵەم بۆیەش بۆ منداڵەکەت.  لەسەر پەڕەی سپی بە گەورەیی پیتەکە بکێشەو با یارمەتیت بدات لە بۆیە کردنی.

دەتوانی بە تیپێک لە ئاستێکی نزم و بەرچاو بۆی هەڵبواسیت تا زوو زوو بێ مەبەست بەرچاوی بکەوێ.

2)پەیڕەوی کتێبی ئیبراهیم ئەمین باڵدار بکە واتە لە دار و دارا وە  بۆی بڕۆ تا ئاسانتر بتوانی بەسەر بابەتەکدا زاڵبیت،چونکە تۆی دایک لەسەر ئەو پەیڕەوە فێرکراویت.

3)کاتێک تێر بوو لە خواردن و ووزەی باشی هەبوو ئەوکات هەوڵی لەگەڵ بدە.

4)بابەتەکەی بە خوێندن و فێرکردن تێ مەگەیەنە بەڵکو پێی بڵێ وەرە یاری ڕەنگ کردن دەکەین، یاخود یاری شاردنەوەی پیت وەک مەتەڵ، بڵێ تۆ بیشارەوە من هەڵی ئەهێنم تا چەن جارێک پاشان بڵێ سەرەی تۆیە.

5)لەڕێگەی ناوی خزم و هاوڕێ و کەسی خۆشەویستەوە پیتی پێ بناسێنە، بڵێ ئەوە پیتی فڵان هاوڕێتە، غیرە ئەیگرێ ئەڵێ ئەی پیتی من، ئیتر ووردە ووردە بەردەوامبە.

6)بیرت بێ هەرگیز لەسەر نەزانین و لە بیرچونەوە لۆمەی مەکە و مەیشکێنەوە، چونکە نەک هەر فێر نابێ، بەڵکو دواتر ڕقی لە قوتابخانەش دەبێتەوە.

7)لە پاداشتی فێربوونی هەر پیتێک ، ئەو خواردنەی بۆ لێبنێ کە حەزی لێیە.

8)ڤیدیۆی بکە کاتێک پیتەکە دەناسێتەوە یان دەینوسێت و بینێرە بۆ کەسێکی خزم کە خۆشی ئەوێ، وەک خاڵ ، مام ، پور… داوای لێبکە بە ڤۆیسێک دەست خۆشی و ئافەرینی بکات.

 9)بێ هیوا مەبە و تا دوو هەفتەش چاوەڕێی ئەنجامی زۆر باش مەبە با شۆک نەبیت.