کەتان خادیمی
مێزەری سپی لەنێو تابوتدا جێی نابێتەوەو ناچێتە نێوگۆڕ،
تەنها ماڵئاوایی لەسەرێک ئەکات کەنەیهێشت پەڵەی ژەنگو ژاری دنیای لێبنیشێت.
دێتەوە دەبێتە سەدان پارچە بۆ سەری سەدان فەقێ
شەوانە هاودەمی خەڵوەتی حوجرە و
بەیانیان لە میحراب لەوانەیەکی نوێدا باس لە سەکەراتی مردن و لیقای خوداو ئاشتی خێزان و عیشقی رەسول و سووتان لەعیشقی حەقیقیدا دەکات.
کتێبەکانی عەقیدەو تەفسیر لەکتێبخانەکەدا ئەگرێت
خەمی قورسی ژیان و هەناسەی دەستکرد بەدیوارەکانی مزگەوتەوە ئەنووسێتەوە.
کە ئێوارەش دادێت
بەچپەوە قووڵاییە تاریکەکانی ڕۆح ئەدوێنێت
کەخۆر هەڵدێت دەبێتە بەرماڵ بۆ سوجدەی ڕژاوی دایکێک
لەمەراسیمی ئیجازەنامەکاندا لە ڕیزی یەکەم بە دەنگێکی هێمنەوە (مەولاي صلي) ئەخوێنێت.
جاروبار خۆیدەکات بە حوجرەداو
دێتەوە نێو وانەکانی تەفسیرو علوم قورئان.
مێزەری سپی ناچێتە ناو گۆڕ ئەو بۆ ئەبەد بەسەر زەویدا دەگەڕێت.
لافیتەیەکی سپی ئاشتیە لەڕۆژانی شەڕو دووکەڵدا،
ویردی گۆچانێکە بەرەو مزگەوت.
چیرۆکێکی زیندووە لەڕۆژانی هەینیدا دەڕژێتە نێو گەڕەک
م ێ ز ە ر ی س پ ی وانەیەکە دەبێت هەموو مەلایەکی سوختە بیخوێنێت.
ئەو ناچێتە ناو گۆڕو دێتەوە بۆ حوجرەو بۆ هەمیشە چیرۆکێکە لەنێو مێژووی حوجرەدا سەوز.
