پەروەردەو خاڵیبوونەوەی مەعریفە بەزانست

‎خەرمان عبدالكریم

 ‎پەروەردە ئەو چەمكە گشتگیرەی هەمووان بەپیێ پسپۆری و پسپۆری جیاواز قسەی لەسەر دەكەین، بێئەوەی درك بەوە بكەین كەمامەڵەكە لەگەل مرۆڤدایە، ئەم مامەڵەیە هەر لە لەدایكبوونەوە دەست پیدەكات تا كۆتایی ژیان، هەموومان لەدارشتن و پەروەردەكردنی كۆمەلە تاكێك بەرپرسیارین، ‎ئایا هەرگیز ئەو گریمانەیە هاتۆتە پێش چاوت كە بۆ دەبێت مندال لە قۆناغەكانی ژیانیدا پڕ بێت لەجوڵە، بۆ ئەمانەوێت كۆت و بەندی ئازادی جوڵەی مرۆڤێك بكەین، لەكاتێكدا هەندێك جوڵە ئاساییەو دەكرێت بەپێی تێپەڕبوونی كات مرۆڤ تێی بپەرینیت ‎لەكاتێكدا بەهەزاران مامەڵەی ناپەروەردەیی و قسەی نەشیاو لە زارمان بەردەبێتەوە لەڕووی مرۆڤێكدا، بەڵام قبوڵمان نییە خەندەیەك بكات، هیچ كام لە ئێمەی پەروەرشیار لەتواناماندا نییە كەمترین كات دانیشین، چونكە خومان بە پیاسەی نێوەندی نێوان تەختەكانەوە گرتووە، لەهەمان كاتیشدا بە هەزاران جار دەلێین ڕێك دانیشە.

پەروەریاری بەڕێز، ئەم وەچەیە هێندە بالای بەرزە جێێ نابیتەوە لەو تەختە كۆن و تەسكەی لەسەری دانیشتووە، بواری بدە تا لانی كەم بەئاسودەیی دابنیشێت، زانست بەزۆر وەرناگیرێت، ڕێگە بدە خۆشیان بوێیت تا بتوانن دۆستانە مامەڵە لەتەك وانەكەتدا بكەن، هەلی گفتوگۆیان پێ بدە تا فێر ببن لەناو كۆڕو سیمینارو چالاكیەكاندا ڕەهایانە ‎بینە گۆ، ‎مەعریفەی بوونی تیا دروستبكە لە هەموو زانستەكە گرنگترە، دواتر هەر خۆی قبولی وەرگرتنی زانستت لێدەكات و بەدواتدا وێڵ ئەبێت، چونكە ‎ئەساسی پەیوەندی مامۆستاو خوێندكار ڕێزو هاوسۆزی و خۆ خستنە ‎شوێنی ئەوانی ترە، ‎هەر ئەو ڕێگە كۆن و سواوەیە وایكرووە هیچ داهێنانێك بەرهەم نەیەت، چونكە هێندە سەرقاڵی چالاكی وینەگرتنە لە ‎خوێندنگەكان، هێندە سەرقاڵ نەبون بەگەڕان بەشوێن حەزی خوێندن.

 ‎باشترین چارەسەر هەر مامۆستایەك بگەڕێتەوە بەو پلانەی كە هەیەتی تا بتوانیت گۆڕانكاری ڕیشەیی بكات لە بوارەكەی خۆیی و فیدباك وەربگرێت، تا لایەنە باش و خراپەكان بزانێ، لەڕێگەی تاقیكردنەوەی جۆراو جۆرەوە ئاستی خوێندكار هەڵبسەنگێنێت.