لە پێشوازی گەورە مامۆستاو پێشەنگی ئەخلاق و جوانی:

کێ ئەرکی ئێمە دیاری دەکات؟

( النقل – العقل – الحقل)

طە زەڵمی

سەرچاوەکانی دیاری کردنی ڕۆڵی مرۆڤی پەیامدار لەم سێ بوارە بەدەرنین

یەک/ النقل: سروش و دەقەکانی قورئان و فەرموودە کە بە (خبرى صادق )، پێمان گەیشتووە.

دوو/ العقل: ژیری و پەی پێ بردنی مرۆڤ لە ڕێی ( اجتهاد)و، بەگەڕ خستنی لێهاتن و توانای دانایی و پەندیاری.

سێ/ الحقل: واتە واقیع و کۆمەڵگە!

بێگومان سێ هەمیان بەرپرسە لە دیاریکردنی ئەرک و ڕۆڵ پێدان!

پێویستە مرۆڤی پەیامدار ئەو شتە بکات کە کۆمەڵگە پێویستی پێیەتی، بە پێی ( فیقهی واقیع) و ( فیقهی ئەولەویەت)، پڕکردنەوەی بۆشاییەکانی کۆمەڵگەو چارەسەرکردنی کێشەو گرفتەکانی دەبێتە خەمی ئانی و هەنوکەیی مرۆی پەیامدارو کاری لە پێشینەی.

بەسەرنج گرتن لە سیرەتی پێغەمبەری سەروەری مرۆڤایەتی دەبینین چارەسەرکردنی کێشەکانی کۆمەڵگە و، پڕکردنەوەی بۆشایی یەکانی دەبێتە کاری لەپێشینەو هەنگاوە سەرەتاییەکانی.

هەر بۆیە کە پێغەمبەر (درودو سڵاوی خوای لەسەر)هات کۆمەڵگە گرفتاری:

– جهل ( نەزانین)

-ضلال ( گومڕایی)

-شقاء ( بەدبەختی)

-فقر  ( هەژاری)

-ظلم ( ستەم) بوو.

ئەویش بە بەرنامەو پلانێکی وورد دەستی برد بۆ کێشەکان و

جەهلی گۆڕی بە زانست و

گومڕایی کردە هیدایەت و

بەد بەختی بە خۆشبەختی و

هەژاری بە بێ نیازی و

بە پەیڕەو کردن و پیادەکردنی سیستەمی داد پەروەری کۆتایی بە ستەم هێنا.

دەسا هەزاران درودو صەلاوات لە دیداری بێت.