چ پیاوێك شایسته‌ی هه‌ڵبژاردنی تۆیه‌ بۆ ژیانی هاوسه‌ری

 کاوە هاوڕاز

 ٭ پیاوێك هه‌ڵبژێره‌ ..كاتێك سه‌رده‌كه‌یته‌ سه‌رشانی، واهه‌ست بكه‌ی كه‌ ئیدی هیچ شتێك له‌دنیادا ئازارت نادات …

 ٭ پیاوێك هه‌ڵبژێره‌ .. كاتێك سه‌رده‌كه‌یته‌ سه‌رسینه‌ی.. واهه‌ست بكه‌ی ئیدی كه‌شتیی ئاواته‌كانت گه‌یاندۆته‌ كه‌ناری ئارامی.

 ٭ پیاوێك هه‌ڵبژێره‌، بۆت بگری نه‌ك بتگریه‌نێت و، له‌ ناخۆشترین كاتی ناخۆشیتا به‌ جوانترین ئافره‌تت بزانێت..

٭پیاوێك هه‌ڵبژێره‌..بێ ئارام بێ بۆساتی ئازارچه‌شتنت و، به‌ خه‌مباری به‌جێت نه‌هێڵێت .

٭ پیاوێك هه‌ڵبژێره‌..به‌ جۆرێك تۆی خۆش بوێت كه‌ وا بزانيت جگه‌ له‌تۆهیچ ئافره‌تێكی دی له‌ دنیادا نییه‌.

 ٭ پیاوێك هه‌ڵبژێره‌..كاتێك پێی ده‌ڵێیت ( دووركه‌وه‌ لێم)، زیاتر لێت نزیك ده‌بێته‌وه‌.

 ٭ پیاوێك هه‌ڵبژێره‌، له‌ خۆت زیاتر لێت تێ بگات و،حه‌وسه‌ڵه‌ی ده‌مارگرژیی تۆی بۆ هه‌ر تیره‌و گرووپ و لایه‌نێك هه‌بێت.

٭ پیاوێك هه‌ڵبژێره‌..كه‌ بزانێ دڵێكی عاشقی تۆی هه‌یه‌و، ته‌نها له‌ دڵه‌وه‌ غیره‌ت لێ بكاو، پیاوێكی ڕووكه‌شكاری ئه‌وینی دنیاپه‌رستی نه‌بێت.

 ٭ پیاوێك هه‌ڵبژێره‌..كه‌ توانای ڕووناك كردنه‌وه‌ی تونێلی خه‌ونه‌كانتی هه‌بێ و به‌ په‌نجه‌ نه‌رمه‌كانیشی شاره‌زای یاری كردن به‌ تاڵه‌زێڕینه‌كانی زوڵفی خاوت بێت.

٭ پیاوێك هه‌ڵبژێره‌، به‌ خه‌نده‌ی ڕاسته‌قینه‌ی ئه‌وین و، به‌ په‌یڤی به‌رائه‌تی ڕاستگۆیی ، كۆتری نازی كچێنییت له‌ سه‌ر هێلانه‌ی دڵی ده‌سته‌مۆكات. نه‌ك به‌ تازه‌ترین مۆدێلی ئۆتۆمبێل و.. به‌ خۆشترین باخ و ڤێللا ، تۆش بكات به‌ ( ژماره‌یه‌كى تازه ) له‌ ژماره‌ی قوربانییه‌كانی.