بەهرە ڕەفیق
شتێک لەنێو زەمەنە ترسناکەکەی ئێمە ڕوویدا، ئێمە لەو تاقمە نەبووین حەوسەڵەی خواستنی گۆڕینی ڕەگەزمان هەبێ، بەڵام بەکارتێکردنی ئەو پلانە دوورودرێژەی مرۆڤایەتی بۆ دژ و بەیەکدادانی هەردوو ڕەگەز، سەدەیەک ژن سالاری و سەدەیەک پیاو سالاری لەنێو یاری و، گەمەیەکی بەرزو نزمدا کەجارێک دەستی پیاو بەرز دەکرێتەوە وەکو هێزو، جارێک دەستی ژن بەرز دەکرێتەوە وەک بەشخوراو..
ئێمە تەواو ماندو کراین و ئەمجارە (ٳختیار) Option
بژاردەمان خرایە بەردەست بەشێوەیەکی داواکراو ( ٳجبار Forced) بە پلانێکی هەنگاو بۆ هەنگاو قبوڵی بکەین بەڵێ قبوڵی بکەین، وە ڕازی بووین ڕۆڵـــ….ەکانمان ئاڵوگۆڕ پێبکەین ..
بەڵێ ئێمە ڕازی نەبووین بەگۆڕینی ڕەگەز، بەڵام ئاڵوگۆڕمان کرد لەئەرک و ڕۆڵ، کەوتینە گۆڕینەوەی ڕۆڵی ڕەگەزی لەنێوان مەزاجی کەسەکان (ژن و پیاوەکان) و، سەردەمە تاریکەکەماندا.
هیچمان ڕازی بە بەشی خۆمان نەبووین و، بەشی بەرامبەریشمان پێ کەم و کوڕییە.
کەوتمەوە بیری گفتوگۆی ژن و پیاوێک (کە زۆر لەمێژە بوو کەوتبوونە ژێر کاریگەری ئەم گەمە جیهانیەی کە ژنەکان دەتوانن کاری پیاو بکەن و، پیاوەکانیش ئەبێ نەرمیان هەبێ لەکارو ئیشی ناوماڵی خانمەکەیدا).
ژنەکە بە پیاوەکەی ووت :
بیرتە ئەو ڕۆژەی بڕیارماندا ئەرکەکانمان بەش بکەین و، هیچ جیاوازیەک نەبێ لەئەرک و ڕۆڵ و چۆنیەتی ژیانمان؟
ئەو ڕۆژە من ((لەدووای ماندوویەتیەکی زۆر لەخانم بوونم و قەتیسی دەستی کلتورو دین و پیاو سالاری)) پاڵێورام بۆ یاریەکی جیهانی نێو ساحەو مەیدان، لەگەڵ تۆ هێزێکی زۆر باشم هەبوو بۆ بەرەنگاربوونەوە، بەڵام ڕاستی هێزی من لەجەستەمدا نەبوو تایبەتمەندییە مێینەکانی خۆمم بەکارهێنا تا زاڵ بم بەسەرتاو کارەکەش سەری گرت؟
پیاو:چۆن؟
ژن: خاڵی لاوازی تۆم پێ وترا هەر لەلایەن هاوڕەگەزەکانتەوە، زیاتر هەستەکانتم بەکار ئەهێنا بۆ فشار خستنە سەر هێزە جەستەییەکەی تۆو، سنوری تایبەتمەندییەکانی تۆم بڕی و باوەڕم بۆتۆ دروست کرد، کە منیش دەتوانم ئەو کارانە بکەم کەتۆ دەیکەی.
پیاو: باشە بۆچی هاوڕەگەزەکانم دەبێ وەها کارێک بکەن؟
ئەمە جەنگان نیە دژی ڕەگەزی خۆمان؟
ژن : بەڕواڵەت بەڵێ جەنگانە دژی خۆتان، بەڵام لەناوەڕۆکدا نەخێر بەدوو جۆر خزمەتی خۆتانتان کرد.
یەکەم کەمکردنەوەی ئەرک و قورسایی ژیان،
دووەم هێنانە دەرەوەی ژن لەو کەوانە داخراوەی سەرەوە کە ئاماژەم پێکرد و چۆنتان بوێ بەپێی ویست و ئارەزووی خۆتان ئاڕاستەمان بکەن.
پیاو: کام؟ کام کەوانەیە؟
ژن: (خانم بوون لەنێو ماڵ لەژێر چەتری دین و کلتورو پیاو، وەکو یەکەم بەرپرسی کەشتیەکە کەناونرا پیاو سالاری و لێرەوە جەنگەکە گەرم کرا..)
پیاو: هاوکێشەکە زۆر ئاڵۆزە ئێستا ئێمە لەبەردەم وەرگرتنەوەی نازناوەکەین بۆ ژن.
ژن: چ نازناوێک؟
پیاو : ژن سالاری.
ژن: نا ئیتر ئەم وشانە باوی نەماوە ئێستا نە ژن نە پیاو هەرگیز ئەو پاشگرە وەرناگرنەوە،
ئێستا ئێمە بۆ شتێکی تر دەگەڕێین؟
پیاو :چی؟
ژن: شتێکی ون بوو کە ئەستەمە بیدۆزینەوە، ئێستا ئێمە هیچمان بۆ گرنگ نیە تەنیا ئەمانەوێ پێشگرو پاشگری مرۆڤ وەربگرینەوەو، ببینەوە بەبەشێک لەپەراسووی چەپی ئادەم و ببینەوە جێ سوکناو ئاواتی بێ سنوری ئەو منداڵانەی دەورەیەکی زەمەنە بەواقی وڕماوەوە سەیری جەنگە بێ ماناکانی ئێمە دەکەن، ئەوان ماڵێکی گەرمیان دەوێ، دایکێکیان دەوێ هەڵگری بڕوانامەکانی (دایک بوون ، دایک بوون ، دایک بوون ….)بێت.
باوکێکیان دەوێ سێبەری ڕۆژە تاقەت پڕوکێنەکانیان بێت، هێزی ماندوویەتی لەشەڕەکانی ڕۆژگار..
ئاااااهـ.هـ.
عەجەب گەشتێکی بەدمان ئەنجامدا، بۆ ژیانکردن نێردراینە نێو ئەم مەزرای ژیانەو، ئێمە جەنگمان بەرپا کرد و هەمووش دۆڕاین.
